နီဘာရန်း၏ ဘ၀သည် တော်တော်လက်တွေ့ကျသော ဘ၀ဖြစ်၏။ စိတ်ကူးယဉ်စခန်းဆို၍ တစ်ချက်ကလေးမျှပင် မရှိ။ လူတိုင်း၏ဘ၀တွင် ချဉ်ချဉ်စပ်စပ် အရသာကလေးတွေ ရှိတတ်သည်ဆိုသည့် အချက်ကိုလည်း သူ မစဉ်းစားမိသေး။ ခြေအစုံသည် ဖိနပ်ဟောင်းတစ်ရံကို စီးသည့်အခါတွင် သက်သာချောင်ချိစွာ ရှိသကဲ့သို့ နီဘာရန်းသည်လည်းသူ့ဘ၀တွင် အေးအေးဆေးဆေးနှင့် အချိန်ကုန်သည်။ အချစ်ကိစ္စကို ယောင်၍မျှပင် စိတ်ကူးခြင်း မပြုမိ၊ ယောင်၍မျှပင် မပြောမိ။
သူသည် အိပ်ရာမှစောစောစီးစီးထပြီး လမ်းသွယ်ကလေးကို မျက်နှာမူနေသည့် အိမ်ရှေ့တံခါးပေါက်တွင် ထိုင်ကာ တမာကူအိုးကို ရှူသည်။ လမ်းပေါ်တွင် လူတွေဥဒဟိုသွားလာနေကြသည်။ သူတောင်းစားများက သီချင်းဆိုသွားကြသည်။ အထမ်းသည်တစ်ယောက်က ပုလင်းဟောင်းများကို အော်ဝယ်နေသည်။ ထိုသို့အမျိုးမျိုးပြောင်းလဲနေသော ရှုခင်းတို့သည်သူ့ကို ဆွဲဆောင်ခြင်းငှာ မတတ်နိုင်ကျကုန်။ သရက်သီးသည်တို့၊ ငါးသည်တို့လာသည့်နေ့မျိုးကျမှသာလျှင် နီဘာရန်းသည် အချိန်ကြာမြင့်စွာ ဈေးဆစ်ပြီးနောက် နည်းနည်းပါးပါး ၀ယ်လိုက်သည်။ ယင်းမှာ ညနေစာကို ကောင်းကောင်းစားတော့မည်ဆိုသည့် သဘောဖြစ်သည်။ အချိန်ကျသည်နှင့် သူသည် ကိုယ်ကိုဆီလိမ်းပြီးနောက် ရေချိုးသည်။ နံနက်စာကို စားသည်။ ကြိုးတန်းပေါ်တွင် လွှားတင်ထားသည့် အပေါ်အင်္ကျီကို ၀တ်သည်။ တမာကူကို တစ်ရှူ၊ နှစ်ရှူသည်။ ကွမ်းယာ နောက်တစ်ယာကို ပါးစပ်ထဲငုံပြီး ရုံးသို့ ထွက်လာခဲ့သည်။ ညနေဆိုလျှင် အိမ်နီးချင်းဖြစ်သည့် ဂို့ရှ်၏ အိမ်တွင် ထွေရာလေးပါး ပြောသည်။ ညနေမိုးချုပ်အိမ်ပြန်ရောက်လျှင် ထမင်းစားသည်။ ထို့နောက် ဇနီးသည် ဟာရာရှန္ဒရီနှင့်အတူ အိပ်ရာသို့ဝင်သည်။
လင်မယားနှစ်ယောက် အိပ်ရာထဲတွင် ပြောသည့်စကားများမှာလည်း ကဗျာမဆန်လှပါ။ ထိုသို့ကဗျာမဆန်သည့်အတွက်လည်း နီဘာရန်း ၀မ်းမနည်းလှပါ။ သူတို့လင်မားပြောသည့် အကြောင်းအရာများမှာ မစ်ထရာ၏မင်္ဂလာဆောင်သို့ မည်သည့်လက်ဖွဲ့မျိုး ပို့သင့်ကြောင်း၊ နောက်ရောက်သည့် အိမ်ဖော်မလေးမည်မျှ ထောင့်မကျိုးကြောင်း၊ မည်သည့်ဟင်းတွင် မည်သည့်အမွှေးအကြိုင်ကို ခတ်သည့်အကြောင်း စသည့်အကြောင်းများ ဖြစ်သည်။
ထို့နောက် တပို့တွဲ-တပေါင်းလောက်တွင် ဟာရာရှန္ဒရီ အကြီးအကျယ်နာမကျန်းဖြစ်သည်။ အဖျားမှာ ကျသည်ဟူ၍ မရှိ ဆရာဝန်က ကွီနိုင်တွေကို များများ တိုက်လေလေ အဖျားမှာလည်း တက်သည်ထက် တက်လာလေ ဖြစ်နေသည်။ အချိန်ပြင်းစွာ စီးဆင်းလာသည့် ချောင်းကြီးတစ်ခုကို ဆီး၍တမံတုတ်လိုက်သည်နှင့် တူတော့သည်။ ရက်ပေါင်းလေးဆယ်လုံးလုံး စိုးရိမ်ရသော အခြေအနေတွေ ရှိနေသည်။
နီဘာရန်းသည် ရုံးကိုလည်းမသွားတော့ပြီ။ ဂို့ရှ် အိမ်က ညနေစကားဝိုင်းသို့လည်း မရောက်တော့ပြီ။ နီဘာရန်းသည် ဘာလုပ်၍ ဘာကိုင်ရမည်မသိဘဲ ဖြစ်နေသည်။ ဇနီးသည်၏ အိပ်ရာနားသို့လာကာ လူမမာအခြေအနေကို အကဲခတ်လိုက် ၀ရန်တာက ကုလားထိုင်တွင် ထိုင်ပြီး စိတ်ညစ်ညစ်နှင့် တမာကူကို ရှူလိုက်ဖြင့်သာ အချိန်ကုန်နေသည်။ သူသည် သမားတော်များကို တစ်နေ့လျှင် နှစ်ကြိမ်လဲပြီး အများသူငါပြောကြားသည့် ဆေးဝါးအမျိုးမျိုးတို့ကိုလည်း ရေလဲနှင့်တိုက်၏။ ရက်လေးဆယ် မြောက်သည့်နေ့တွင်မူ ထိုသို့ ဂရုတစိုက်ဖြင့် ကုထုံးမျိုးစုံလက်တန်းစမ်းပြီး သည့်တိုင် လူမမာမှာ မသေမပျောက်ဘဲ နာလန်ထလာခဲ့သည်။ သို့ရာတွင် လူရုပ်မပီတော့။ အိမ်သားများအား အဝေးက ခြောက်ပြနေသော တစ္ဆေတစ်ကောင်နှင့်သာ တူတော့သည်။
ထို့နောက် နွေဦးပေါက်သို့ ရောက်လာခဲ့သည်။ တောင်လေ တိုက်စပြုလာလေသည်။ ပူအိုက်သည့် ထိုညများတွင် လရောင်သည် ဇနီးမောင်နှံတို့၏ အိပ်ခန်းဆောင်များ၊ ကြင်စဦးတို့၏ အိပ်စက်ရာများပေါ်သို့ ဖြာကျစပြုလာလေသည်။
ဟာရာရှန္ဒရီ လဲလျောင်းနေသည့် ကုတင်အနီးရှိ ပြတင်းပေါက်မှ လှမ်းကြည့်လိုက်လျှင် ကျောချင်းကပ် အိမ်၏နောက်ဘေး ပန်းခြံကလေးကို လှမ်းမြင်ရသည်။ ပန်းခြံဆိုသော်လည်း များစွာ သာယာလှသည်ဟု မဆိုနိုင်ပါ။ စိတ်ကူးရတုန်း ကောက်စိုက်ထားပြီး ပြစ်ထားသည့် အပင်ကလေးများသာ ရှိပါသည်။ ဖရုံနွယ်များသည် သစ်ငုတ်တိုကြီးတစ်ခုကို တွယ်တက်နေကြသည်။ သစ်ပင်ပတ်လည်တွင် ပေါင်းပင်များသည် တောထအောင် ပေါက်နေကြသည်။ မီးဖိုအနီးမှ အုတ်ဝန်းထရံမှာလည်း ပြိုကကျပျက်စီးနေပြီး နေ့စဉ်နှင့်အမျှ လာ၍ မီးသွေးမှုများ၊ ပြာမှုန်များ လောင်းထားသဖြင့် အပုံကြီး ဖြစ်နေသည်။
သို့တိုင်အောင် ဟာရာရှန္ဒရီသည် ထိုရှုခင်းကလေးကို ငေးကြည့်ရင်း ကျဉ်းမြောင်းလှသော သူ့ဘ၀တစ်သက်တာတွင် ယခင်က တစ်ခါမျှ မခံစားဖူးခဲ့ရသော ပီတိတစ်မျိုးကို ခံစားနေရသည်။ သူ့စိတ်သည် နွေတွင် ခန်းခြောက်စပြုနေကာ သဲပြင်ပေါ်တွင် စီးဆင်းနေသည့် စမ်းချောင်းကလေးတစ်ခုလို ဖြစ်နေရသည်။ ချောင်းကလေးသည် သေးမျှင်သည့်ရေစီးကြောင်းကလေးတစ်ခုလို ဖြစ်သွားကာ ကြည်လင်နေသည်။ မနက်ခင်းနေခြည်များသည် ချောင်းကလေးပေါ်သို့ ဖြာကျလာသည်။ လေညင်းက ရေပြင်ကို ပွတ်သပ်ပေးနေသည်။ ညဆိုလျှင် ကြယ်ပွင့်များသည် ကြည်နူးစရာကောင်းသော အတိတ်အဖြစ်အပျက်များ အရိပ်ထင်သည့်ပမာ ရေထဲတွင် လာ၍ အရိပ်ထင်ကျသည်။ မမြင်ရသော လက်ချောင်းများသည် သူ့ရင်ထဲရှိ သေးမျှင်သော စောင်းကြိုးလေးများကို လာ၍ တီးခတ်သည့်နယ်ရှိကာ ပြောမပြတတ်သော ဂီတသံတစ်မျိုးကို ကြားရသည်ဟု စိတ်တွင် ထင်မိသည်။
ထိုသို့သောအခါမျိုးတွင် အနီးရှိ ခင်ပွန်းဖြစ်သူက ဘယ်နှယ့်နေသေးသလဲ၊ သက်သာရဲ့လားဟု မေးလိုက်လျှင် သူ့မျက်လုံးများထဲတွင် မျက်ရည်များသည်အလိုလိုပဲ လာတတ်ကြသည်။ သေးသွယ်ချောင်ကျနေသည့် မျက်နှာပေါ်တွင် မျက်ရည်ပေါက်များသည် ပြည့်လျှံလျက်ရှိသည်ဟု ထင်ရကာ ဖျော့တော့သည့် သူ့လက်ကိုကိုင်ထားသည့် သူ့ယောက်ျား၏မျက်နှာကို မော့ကြည့်လိုက်ရင်း ကျေးဇူးတင်ခြင်း၊ ချစ်ခင်ခြင်း စသည့် ခံစားချက်များသည် ရင်ထဲတွင် အလျှိုလျှိုပေါ်လာကြသည်။ ထိုအခါတွင် ခင်ပွန်းဖြစ်သူ နီဘာရန်း ရင်ထဲတွင် ယခင်က ခံစားရခဲ့ဖူးသော ကြည်နူးဝမ်းသာမှုတစ်မျိုးသည် အလိုလိုပေါ်ပေါက်တတ်သည်။
ထိုသို့သော ကြည်နူးမျိုးသည် အချိန်တန်ကြာသည့်အထိ ရှိနေတတ်သည်။
တစ်ည၌ လပြည့်ဝန်းကြီးသည် အုတ်နံရံအနီးတွင် ပေါက်နေသော တည်ပင်ခြောက်ကြီးနောက်မှ တငြိမ့်ငြိမ့် ထွက်ပေါ်လာစဉ် လေရူးကလေးသည် တသုန်သုန် တိုက်ခတ်နေသည်။ တိတ်ဆိတ်နေသော ညတွင် သစ်ကိုင်းများသည် သက်ပြင်းချနေကြသည်။
ဟာရာရှန္ဒရီသည် ခင်ပွန်းဖြစ်သူ၏ ဆံပင်များကို လက်ချောင်းများဖြင့် အသာဖွပေးရင်း .....
“ကျွန်မမှာ သားသမီးမရနိုင်တော့ဘူး။ ရှင်လဲ နောက်တစ်ယောက် ထပ်ယူပါလား”ဟု ပြောသည်။
ဟာရာရှန္ဒရီသည် ထိုစကားကို မကြာခဏပြောတတ်သည်။ စိတ်သည် ပျော့ပျောင်းကြည်နူးကာ အချစ်ဝင်နေသည့်အချိန်၌ အရာရာကို လုပ်နိုင်သည်ဟု ထင်တတ်ကြသည်မှာ ဓမ္မတာ ဖြစ်သည်။ ထိုအချိန်က ဟာရာရှန္ဒရီ၏ စိတ်ထဲတွင် အနစ်နာခံလိုစိတ်သည် အရှိန်ကြီးမားနေသည်။ လှိုင်းလုံးသည် ကျောက်ဆောင်ကျောက်ကမ်းပါးတို့ကို အဆက်မပြတ်ရိုက်ခတ်သကဲ့သို့ စိတ်နှလုံးနူးညံ့ခြင်း၊ ကြည်နူးခြင်း၊ အနစ်နာခံခြင်းစသည့် စိတ်ဓာတ်တို့သည်လည်း စုပေါင်းကာ စွန့်လွှတ် အနစ်နာခံသောကိစ္စကို ပြုလုပ်ရန် တိုက်တွန်းနှိုးဆော်လျက်ရှိသည်။
ဟာရာရှန္ဒရီ၏ စိတ်ထဲ၌ ငါ သူ့ကို လေးစားတယ်။ ကြည်ညိုတယ်။ ဒါကြောင့် သူ့အတွက် တစ်ခုခုတော့ လုပ်ပေးသင့်တယ်ဟု ဆုံးဖြတ်လိုက်သည်။ သို့ရာတွင် စိတ်ကူးနှင့် လက်တွေ့ကြားတွင် ကြီးမားသည့် ကွာဟချက်ကြီးရှိတတ်စမြဲ မဟုတ်လော။ မိမိသည် သူ့အတွက် ဘာများထိထိရောက်ရောက် လုပ်ပေးနိုင်ပါသနည်း၊ မိမိတွင် ဥစ္စာပစ္စည်းမရှိ။ သြဇာတိက္ကမမရှိ၊ ပညာမရှိ၊ အသက်တစ်ချောင်းသာလျှင် ရှိသည်။ ထိုအသက်တစ်ချောင်းကို သူ့အတွက် စွန့်လွှတ်ပေးနိုင်လျှင် မည်မျှကောင်းမည်နည်း။
ဟာရာရှန္ဒရီသည် သူ့ယောက်ျားအတွက် ကလေးတစ်ယောက်လောက်တော့ မွေးပေးချင်သည်။ ထိုကလေးသည် ယမင်းရုပ်ကလေး တစ်ရုပ်လို လှပနေရမည်။ ညှစ်ပြီးစနို့လို လတ်ဆတ်နေရမည်။ နို့နှစ်လို နူးညံ့နေရမည်။ မြားနတ်မောင်ကလေးလို ချစ်စရာကောင်းနေရမည်။ သို့ရာတွင် သူ့အသက်ကို စွန့်လွှတ်သည့်တိုင် ထိုသို့သော ကလေးငယ်မျိုးကို သူ မွေးဖွားနိုင်စွမ်းမရှိတော့ပြီ။ ထိုသို့ စဉ်းစားမိသည့်အခါတွင် သူ့ယောက်ျားသည် မိန်းမတစ်ယောက် ထပ်ယူမှ ဖြစ်တော့မည်ဟု သူ သဘောပေါက်လာခဲ့သည်။
မိန်းမများသည် ကိုယ့်ယောက်ျားနောက် မိန်းမယူမည့်အရေးကို ဘာကြောင့်များသည်လောက် စိုးရွံ့ထိတ်လန့် နေကြရသနည်း။ ဘာကြောင့်လောက် ခက်ခဲနေကြရသနည်း။ ကိုယ့်ယောက်ျားကို ကိုယ်ချစ်သည်ဆိုလျှင် က်ုယ့်ယောကျာ်း၏နောက်မယားကိုကော မချစ်နိုင်တော့ပြီလော။
ဟာရာရှန္ဒရီသည် ထိုအတွေးဖြင့် ပျော်နေသည်။
သူ့ဇနီးထံ ထိုစကားမျိုးကို ပထမဆုံး စတင် ကြားရသည့်အခါတွင် နီဘာရန်းသည် ရယ်စရာဟု သဘောထားလိုက်၏။ ဒုတိယနှင့် တတိယ အကြိမ် ကြားရသည့်အခါတွင်လည်း လျစ်လျူရှုလိုက်၏။ သူ့ယောက်ျားက ဆုတ်ဆိုင်းဆိုင်းဖြစ်ကာ လျစ်လျူရှုလေလေ၊ ဟာရာရှန္ဒရီ၏ ယုံကြည်မှုနှင့် ပိုင်းဖြတ်မှုသည်လည်း ကြီးမားလာလေလေ ဖြစ်လာခဲ့သည်။ နီဘာရန်းအဖို့လည်း ထိုစကားကို ကြားရလေလေ ဖြစ်နိုင်သည်ဟု ထင်လာလေလေ ဖြစ်လာခဲ့သည်။ ၀ရန်တာတွင် တမာကူကို ရှူရင်း ကလေးတွေဖြင့် ဆူညံနေသော အိမ်ကလေးကို မြင်ယောင်ကာ ကြည်နူးနေတတ်သည်။
နောင်တွင် နီဘာရန်းသည် ထိုအကြောင်းကို သူကပင် စတင်ပြောလာတတ်သည်။
“အသက်လဲ ကြီးပါပြီကွယ် ... ၊ ဒီအရွယ်ကြီးရောက်မှ မိန်းမငယ်ငယ်ကလေးကို ယူလို့ ဘယ်ဖြစ်မလဲ”ဟု သူက ပြောတတ်သည်။
ဟာရာရှန္ဒရီက သူ့ကို အားပေးသည်။
“အမယ်လေးတော်၊ ဒါအတွက်တော့ ဒီလောက်စိတ်မညစ်ပါနဲ့၊ သူ့ကို ကျွန်မကပဲ သွန်သင်ဆုံးမရမှာပေါ့၊ ကျွန်မ တာဝန်ထားလိုက်ပါ”ဟု ပြောတတ်သည်။
သားသမီး မရှိသည့် ဟာရာရှန္ဒရီသည် အမိရင်ခွင်မှ လွတ်ကာစ ရှက်ရွံ့ရွံ့ အပျိုပေါက်သတို့သမီးကလေးကို မြင်ယောင်ကာ စိတ်ထဲတွင် ကြည်နူးနေသည်။
“ငါ့မှာ ရုံးအလုပ်ရှိသေးတယ်ကွ၊ ပြီးတော့ ဗာဟီရတွေကလည်း တစ်ပုံကြီး၊ မဖြစ်ပါဘူးကွာ၊ ကောင်မလေး နွဲ့ဆိုးဆိုးတာ၊ ပူဆာတာတွေကို ငါ မခံနိုင်ပါဘူး၊ အချိန်ကုန်ပါတယ်”
နီဘာရန်းက ပြောသည်။
“ဘာဖြစ်လို့ အချိန်ကုန်ရမှာလဲရှင့်။ အခု ကျွန်မ မသေနိုင်သေးတာ တခြားကြောင့် မဟုတ်ဘူးရှင့်။ ရှင့်ကို စိတ်မချလို့၊ ရှင့်အလုပ်တွေ ရှင့်အပေါင်းအသင်းတွေနဲ့ ဘယ်လိုနေကြထိုင်ကြမလဲဆိုတာကို မြင်ပြီးမှ ကျွန်မသေမှာ”
ဟာရာရှန္ဒရီက နောက်တရွှတ်ရွှတ် ပြောသည်။ နီဘာရန်းက အပြစ်ဆိုသည့်ဟန်ဖြင့် ဇနီးသည်၏ ပါးပြင်ကို လက်ချောင်းကလေးဖြင့် အသာအယာ တောက်နေသည်။
နီဘာရန်းသည် နောက်မိန်းမတစ်ယောက် ယူဖြစ်သွားသည်။ ကောင်မလေးက နုနုနယ်နယ်ကလေး ပါးပြင်တွင် မျက်ရည်စကလေးတွေနှင့် နှာခေါင်းပေါ်တွင် ရွှေကွင်းကလေးတွေနှင့် ကောင်မလေး၏အမည်မှာ ရှေလဘာလာ ဖြစ်သည်။ နီဘာရန်းသည် ထိုအမည်ကလေးကို သဘောကျသည်။ ပျိုမြစ်နုနယ်ခြင်းကို နှစ်သက်သည်။ သူ့ခန္ဒာကိုယ်ကလေးကို တစိမ့်စိမ့်ကြည့်နေချင်သည်။ သူ့မျက်နှာကလေးပေါ်က အမူအရာတွေကို မြင်နေချင်သည်။ သူ့လှုပ်ရှားဟန်ကလေးတွေကို ကြည့်နေချင်သည်။ သို့ရာတွင် နီဘာရန်းတွင် အခွင့်မရရှာ၊ ထိုအစား သည်ကောင်မလေးကြောင့် ကြီးတောင့်ကြီးမားအရွယ် ရောက်မှ ဒုက္ခရောက်ရလေဟန်။ “လွဲမရှောင်သာ၍ သည်ကောင်မလေးကို ယူရလေဟန်။ ကောင်မလေးထက် အခြားသောကိစ္စများကို ဂရုစိုက်နေလေဟန်ဆောင်၍ နေရလေသည်။
ဟာရာရှန္ဒရီသည် သူ့ယောက်ျား နီဘာရန်း၏ ဖြစ်ပုံကို သတိပြုမိသည်။ ထိုအဖြစ်ကိုကြည့်၍ စိတ်ထဲက ကျိတ်၍ ၀မ်းသာမိသည်။ တစ်ခါတစ်ရံတွင် ဟာရာရှန္ဒရီသည် သူ့ယောက်ျားလက်ကို လှမ်းဆွဲလိုက်ပြီး “ရှင်က ဘာဖြစ်လို့ ခပ်ရှောင်ရှောင် လုပ်နေရတာလဲ၊ ကောင်မလေးက ရှင့်ကိုကိုက်စားမှာ မို့လို့လား”ဟု မေးတတ်သည်။
ထိုအခါမျိုးတွင် နီဘာရန်းသည် ခပ်ရှက်ရှက်ဖြင့် “မင်းကလဲ ဘာတွေ လျှောက်ပြောနေတာလဲ၊ ငါ့မှာ အလုပ်ကိစ္စတွေ တစ်ပုံကြီး ရှိနေတယ်”ဟု ဆိုသည်။
နီဘာရန်းသည် ထောင်ချောက်ထဲရောက်နေသူလို ဖြစ်နေသည်။ သူ့ မိန်းမက ရယ်၍ တံခါးကို ပိတ်လိုက်ကာ “ကဲ ... ရှင် ဘယ်ထွက်ပြေးဦးလဲ” ဟု မေးတတ်သည်။ သနားစရာ နီဘာရန်းသည် ရှောင်ပြေး၍ မရတော့ဘဲ သူ့ဇနီးအနားတွင် ၀င်ထိုင်လိုက်ရတော့သည်။ ဟာရာရှန္ဒရီက သူ့ယောက်ျားနားနားသို့ ကပ်ကာ ...
“ရှင် ကောင်မလေးကို မိသားဖသားပီပီ တောင်းရမ်းယူခဲ့ပြီးပြီနော်။ သူများ သားသမီးကို အိမ်ခေါ်လာပြီး ပစ်မထားနဲ့”ဟု ပြောတတ်သည်။ ထို့နောက် ရှေလဘာလာ၏လက်ကိုဆွဲပြီး နီဘာရန်း ဘယ်ဘက်တွင် အထိုင်ခိုင်းသည်။ ရှေလဘာလာကိုလည်း မျက်နှာဖုံးကိုဖွင့်၍ ခေါင်းကို အမော့ခိုင်းသည်။
“ကြည့်စမ်း ကောင်မလေးရဲ့မျက်နှာ၊ ဘယ်လောက်လှသလဲ၊ လမင်းကြီး ကျနေတာပဲ”ဟု နီဘာရန်းကို ပြောတတ်သည်။ သို့မဟုတ်လျှင်လည်း အလုပ်ရှိသည်ဟု အကြောင်းပြကာ သူတို့အနားမှထပြီး အပြင်ဘက်မှ အခန်းတံခါးကို ကြားလောက်အောင် ပိတ်သွားတတ်သည်။ သို့ရာတွင် နီဘာရန်းစိတ်၌ မျက်လုံးတစ်စုံသည် နံရံကြားတစ်နေရာမှ ချောင်းကြည့်နေလိမ့်မည်ဟု ထင်သည်။ ထို့ကြောင့် နီဘာရန်းသည် အားတင်းကာ ဥပေက္ခာပြုလုက်ပြီး တစ်ဖက်သို့လှည့်၍ အိပ်ငိုက်နေတတ်သည်။ ရှေလဘာလာကလည်း သူ့မျက်နှာဖုံးကို ပြန်ဖုံးကာ ခပ်ကုပ်ကုပ်ဖြင့် ချောင်ကလေးတစ်ချောင်ထဲသို့ ပျောက်ကွယ်သွားတတ်သည်။
နောက်ဆုံးတွင် ဟာရာရှန္ဒရီသည် ခရီးမရောက်သည့်အတွက် သူ့အကြံကို လက်လျှော့လိုက်သည်။ ထိုအခါတွင်မူ နီဘာရန်းအဖို့ သူကိုယ်တိုင် အားထုတ်ရန် အခွင့်အလမ်း ရသွားလေပြီ။ စူးစမ်းလိုစိတ်၊ လျှို့ဝှက်ကြံစည်လိုစိတ်သည် သူ့ကို စေ့ဆော်တိုက်တွန်းလျက်ရှိလေပြီ။ နီဘာရန်းသည် လက်ထဲတွင် စိန်ကောင်းကျောက်ကောင်းတစ်လုံးကို ကိုင်ကာ လုံးစေ့ပတ်စေ့ကြည့်သကဲ့သို့ ရှေလဘာလာကို စေ့စေ့စပ်စပ် အကဲခတ်သည်။ ထိုရတနာကို သူ ကိုယ်တိုင် စမ်းသပ်ကြည့်လိုသည်။ ယုယပိုက်ထွေးလိုသည်။ လူသူမသိအောင် ကြည့်လိုသည်။ ရှေလဘာလာ၏ နားဆွဲကလေးများ လှုပ်ယမ်းနေပုံ၊ မျက်နှာဖုံးပုဝါလေး နောက်သို့ လျှောကျသွားသပုံ မျက်နှာဖုံးပုဝါကလေးအောက်မှ သူ့မျက်နှာကလေးကို လှစ်ခနဲ မြင်လိုက်ရပုံ၊ ကြယ်ပွင့်တို့ကို ငေးကြည့်သကဲ့သို့ သူ့မျက်နှာကလေးကို စိုက်ကြည့်လိုက်ရပုံ စသည်တို့သည် သူ့အိပ်မက်နယ်မြေထဲသို့ ဆွဲခေါ်သွားသကဲ့သို့ ရှိသည်။
မက်မိုရန်ကုမ္ပဏီမှ စာရေးကြီး မစ္စတာနီဘာရန်းချန္ဒရာသည် သူ့တစ်သက်တွင် တစ်ခါမျှ မခံစားရဖူးသော အဖြစ်မျိုးကို ကြုံနေရလေပြီ။ သူလက်ထပ်ခဲ့တုန်းက သူသည် သူငယ်ကလေးသာသာမျှသာ ရှိသေးသည်။ သူ လူရွယ်ဘ၀သို့ရောက်လာသည့်အခါတွင်ကား သူ့ဇနီးသည်ကိုငြီးငွေ့စပြုနေလေပြီ။ သူ့အဖို့ လက်ထပ်ထိမ်းမြားသည့်ကိစ္စသည် ထုံးတမ်းစဉ်လာတစ်ခုသာဖြစ်ခဲ့သည်။ သူသည် ဇနီးသည် ဟာရာရှန္ဒရီကို ချစ်ပါ၏။ သို့ရာတွင် ထိုအချစ်မျိုးသည် သူ့စိတ်ထဲတွင် ဘာမျှ အမှတ်ထင်ထင်မရှိခဲ့။
သရက်သီးထဲတွင် မွေးလာသည့် သရက်ပိုးသည် ဘယ်အခါမျှ အဆီအနှစ် ကုန်ခမ်းမည်ကို မစိုးရိမ်ရ။ သို့ရာတွင် သရက်ပိုးသည် သရက်သီးအဆီအနှစ်၏ အရသာမှလွဲ၍ အခြားသော သစ်သီးတို့၏ အဆီအနှစ်အရသာကို မသိနိုင်။ သရက်ပိုးကို သရက်သီးထဲမှ အပြင်ဘက်သို့ လွှတ်လိုက်လျှင် ထိုသရက်ပိုးသည် နွေဦးပန်းပွင့်တို့၏ အရသာကို ရှာကြည့်လိမ့်မည်။ ပွင့်ခါစ နှင်းဆီပွင့်များကြားတွင် တစ်ပွင့်မှတစ်ပွင့်သို့ လူးလားပျံဝဲကာ ၀တ်ရည်ကို မြည်းစမ်းသောက်သုံး လိုက်ရသည်ဆိုလျှင်ပင် ထိုပိုးသည် မြူးထူးကခုန်နေပေလိမ့်မည်။
နီဘာရန်းသည် ဂါဝန်ဝတ်ထားသည့် ယမင်းရုပ်ကလေးတစ်ရုပ်၊ ရေမွှေးတစ်ပုလင်းနှင့် သကြားလုံးကလေးများကို ရှေလဘာလာအတွက် တိတ်တိတ်ဝယ်ပေးသည်။ ထိုသို့ ၀ယ်ပေးခြင်းကြောင့် သူတို့နှစ်ယောက်သည် ပို၍ ရင်းနှီးလာကြသည်။ တစ်နေ့တွင် ဟာရာရှန္ဒရီသည် အိမ်မှုကိစ္စတွေ အားချိန်တွင် တံခါးမှ ချောင်းကြည့်လိုက်ရာ နီဘာရန်းနှင့် ရေလဘာလာတို့ နှစ်ယောက် ခရုခွံကလေးတွေဖြင့် ကလေးတွေ ကစားသလို ကစားနေသည်ကို မြင်ရ၏။
လူကြီးတန်မဲ့ ကလေးကစားသလို ကစားနေသည်ကို မြင်ရသည်မှာ တော်တော် ထူးဆန်းနေသည်။ ထိုနေ့ နံနက်စာစားပြီးသည့်အခါ၌ နီဘာရန်းသည် ရုံးသွားချင်ယောင်ဆောင်ပြီးနောက် ရှေလဘာလာ၏ အခန်းထဲသို့ ၀င်သွားသည်။
အဘယ်ကြောင့် လိမ်လည်လှည့်ဖြား နေရသနည်း ...
ဟာရာရှန္ဒရီသည် မျက်လုံးကို သံပူဖြင့် အထိုးခံရသကဲ့သို့ ဖြစ်ကာ ပူလောင်သည့် မျက်ရည်ပေါက်များသည် စီးကျလာကြသည်။ မိမိသည် ကောင်မလေးကို အိမ်သို့ခေါ်လာခဲ့ပြီး သူတို့နှစ်ယောက်ကို နေရာချ ပေးထားပါလျက် အဘယ်ကြောင့် ဤသို့ခိုးကြောင်ခိုးဝှက် တွေ့နေကြရသနည်း .........
မိမိသည် သူတို့ကြားထဲတွင် ဆူးငြောင့်ခလုတ်ဖြစ်နေပြီလောဟု ဟာရာရှန္ဒရီ တွေးမိသည်။
သူသည် မကြာသေးမီက ရှေလဘာလာကို အိမ်မှုကိစ္စတွေကို လုပ်တတ်အောင် သင်ပေးခဲ့သည်။ တစ်ခါတွင်မူ နီဘာရန်းသည် မဖုံးနိုင် မဖိနိုင် ပေါက်ကွဲတော့သည်။
“ကောင်မလေးက ကလေးပဲ ရှိသေးတာပဲကွ။ ဒီလောက်ခိုင်းရင် သေရောပေါ့”
ဟာရာရှန္ဒရီက တစ်စုံတစ်ရာပြန်ပြောမည် လုပ်သေးသည်။ သို့ရာတွင် ချုပ်တည်းကာ အသာပင်နေလိုက်သည်။
ထို့နောက်တွင်မူ ဒုတိယမယားသည် ဘာမျှမလုပ်ရတော့။ ဟာရာရှန္ဒရီသည် အိမ်မှုကိစ္စတွေ၊ အချက်အပြုတ်လုပ်ငန်းတွေကို သူ ကိုယ်တိုင်သာ လုပ်တော့သည်။
ရှေလဘာလာမှာ ဘာကိုမျှမလုပ်ရတော့။ ဟာရာရှန္ဒရီသာလျှင် ကျေးကျွန်တစ်ယောက်သဖွယ် သူ့ကို ပြုစုစောင့်ရှောက်ရသည်။ နီဘာရန်းမှာလည်း အထိန်းတော်တစ်ယောက်ပမာ သူ့ကို အပျင်းဖြေရသည်။ အိမ်တွင်းမှုလုပ်ငန်းများကို လုပ်ခြင်း၊ အခြားသူများအား ပြုစုစောင့်ရှောက်ခြင်း စသည့်ဘ၀တွင် အရေးကြီးသော အလုပ်ဟူသမျှတို့ကို ရှေလဘာလာ ဘာမျှမပတ်သက်တော့။ ဟာရာရှန္ဒရီသာလျှင် အိမ်မှုကိစ္စတို့ကို သိမ်းကျုံး၍ လုပ်နေရသည်။ သို့ရာတွင် ဟာရာရှန္ဒရီသည် ထိုသို့လုပ်ရသည့်အတွက် ၀မ်းမနည်း၊ အားမငယ် ဂုဏ်ပင်ယူလိုက်သေးသည်။ သူ့ယောက်ျားနှင့် ရှေလဘာလာတို့ကိုလည်း “သွား ..... သွား၊ ကစားချေကြ။ တစ်အိမ်လုံး အလုပ်ကို ဒီက ဒိုင်ခံလုပ်မယ်”ဟု ပြောတတ်သည်။
ဟာရာရှန္ဒရီသည် ယခင်တုန်းက သူ့ယောက်ျား၏အချစ်ကို ဝေမျှပေးမည်ဟု သဘောထားကြီးကြီးထားနိုင်ခဲ့ပါ၏။ သို့ရာတွင် ယခုမူ ထိုသဘောထားကြီးမှုတို့သည် ဘယ်ဆီသို့ ရောက်ကုန်ကြပြီနည်း ......
လပြည့်တွင် ကမ်းပြည့်လျှံတတ်သော ဒီရေလို ထိုသို့သော သဘောထားမှုမျိုးတွင် ရင်နှင့်အမျှ ရှိခဲ့စဉ်ကမူ သူ့ကိုယ်သူ အရာရာကို လုပ်နိုင်သည်။ ဘာမဆိုဖြစ်နိုင်သည်ဟု သူထင်ခဲ့သည်။ ထိုစဉ်တုန်းကတော့ ဒီရေအရှိန်က ပြင်းနေသဖြင့် ဆုံးဖြတ်ချက်ကြီးတွေကို ချနိုင်ခဲ့သည်။ ကိုယ့်မှာ စည်းစိမ်ဥစ္စာပေါများတုန်းက ပစ္စည်းဥစ္စာတို့ကို လွယ်လွယ်ဖြင့် ပေးမည်ဟု ကတိပေးခဲ့သော်လည်း ကိုယ်တွင် ဆင်းရဲဒုက္ခရောက်ပြီဆိုသည့်အခါ၌ကား ကတိမတည်နိုင်တော့ဘဲ မူးစပဲစဖြင့် တတိတတိ ဆပ်နေရကာ မသ္ဓရေစာဖြစ်လာခဲ့သည်။ ထိုအခါမျိုးကျမှပင် လူ့စိတ်ဆိုသည်မှာ မည်မျှတွန့်တိုတတ်ကြောင်း၊ လူ့နှလုံးသားသည် မည်မျှမနာလိုတိုရှည်ဖြစ်တတ်ကြောင်း၊ လူသည် မည်မျှသဘောထား ကျဉ်းမြောင်းတတ်ကြောင်း သိလာကြရသည် မဟုတ်လော။
ဟာရာရှန္ဒရီသည် နာလန်ထလာသည့်တိုင် ရင်းစားပြန်ရသည်ဟူ၍ မရှိသေး။ အားနည်းမောပန်းနေပြီး သူ့အသားမှာလည်း ဆန်းစစ်လကလေးအရောင်ကဲ့သို့ ၀ါဖျော့ဖြူလျော်လျက်ရှိသည်။ ထိုစဉ်တုန်းကတော့ သူ့အဖို့ ဘာမျှလိုချင်တောင့်တမရှိခဲ့။ သို့ရာတွင် တဖြည်းဖြည်းဖြင့် ကျန်းမာလာကာ ခွန်အားပြည့်ဖြိုးလာသည့်အခါတွင်မူ သူ့စိတ်ထဲမှ အတွေများသည် အော်ဟစ်ဆန္ဒပြလာခဲ့ကြသည်။
“ခင်ဗျားကတော့ တစ်ချက်လွှတ် အမိန့်ထုတ်လိုက်တာပဲ။ ဒါပေမယ့် ကျုပ်တို့က ကျုပ်တို့ပိုင်ခွင့်တွေကို အဆုံးရှုံးမခံနိုင်ဘူးဗျ”ဟု ထိုအတွေးများက ပြောနေသကဲ့သို့ ရှိသည်။
ဟာရာရှန္ဒရီသည် သူ့အခက်အခဲကို သဘောပေါက်လာသည့်အခါ၌ သူ့အခန်းကို နီဘာရန်းနှင့် ရှေလဘာလာတို့ကို ပေးပြီးနောက် တခြားအခန်းတစ်ခန်းသို့ သွားပြီးတစ်ယောက်တည်း အိပ်သည်။ သူသည် ရှစ်နှစ်သမီးကတည်းက ထိုအခန်းကလေးထဲတွင် အိပ်ခဲ့သည်။ လက်ထပ်သည့်ညတုန်းကလည်း ထိုအခန်းလေးထဲမှာပင် အိပ်ခဲ့သည်။ နောက် နှစ်ပေါင်းနှစ်ဆယ့်ခုနစ်နှစ်တိုင်တိုင်ပင် ထိုအခန်းကလေးထဲမှာပင် အိပ်ခဲ့သည်။ ယခုမူ သူအိပ်ခဲ့သည့်အခန်းကလေးကို စွန့်လွှတ်ခဲ့လေပြီ။
ဟာရာရှန္ဒရီသည် မီးအိမ်ကို ငြိမ်းလိုက်ပြီးနောက် အိပ်ရာပေါ်သို့ လှဲလိုက်သည်။ ထိုစဉ် လမ်းမဆီမှ သီချင်းသံတစ်သံကို ကြားလိုက်ရသည်။ သီချင်းဆိုသံမှာ တော်တော်ကောင်းပြီး တာပလာဗုံကလေးကလည်း နောက်မှ အချက်ကျကျလိုက်တီးလျက်ရှိ၏။ သီချင်းဆုံးသွားတိုင်း သူငယ်ချင်းများက သြဘာပေးနေကြသံများကိုလည်း ကြားနေရသည်။
ထိုသီချင်းသံသည် ဟာရာရှန္ဒရီ၏ ဟာလာဟင်းလင်းဖြစ်နေသော ရင်ထဲက အပူကို နှိုးဆွပေးနေသကဲ့သို့ ရှိသည့်တိုင် သူ့အခန်းနှင့် ကပ်လျက်တွင် ရှိနေသူတို့ကိုမူ ချော့မြူသိပ်ပေးနေသကဲ့သို့ ရှိ၏။ ထိုအခန်းထဲတွင်မူ ရှေလဘာလာ မျက်လုံးများသည် အိပ်ချင်စိတ်ဖြင့် မှေးစင်းလျက်ရှိကာ နီဘာရန်း၏ နှုတ်ခမ်းများမှာမူ သူ့နားသို့ ကပ်လျက်ကာ တွတ်တီးတွတ်တာ ပြောဆိုလျက်ရှိ၏။
ထိုအချိန်၌ နီဘာရန်းသည် ဘန်ကင်ကျန္ဒရ၏ “ကျန္ဒရရှိကာ” ၀တ္ထုကိုဖတ်ပြီးနောက် ရှေလဘာလာအား ခေတ်ပေါ်ကဗျာများကို ဖတ်ပြနေသည်။ မေ့လျော့ပစ်ထားခဲ့သည့် နုပျိုမှုရေပန်းရေမြွှာတို့သည် စိမ့်ယိုစီးထွက်လာကာ သူ မမျှော်လင့်သည့်အချိန်တွင် အရှိန်ဟုန်ပြင်းစွာဖြင့် ပန်းထွက်လာကြသည်။ ထိုသို့သောအဖြစ်မျိုးကို မည်သူမျှ မျှော်လင့်ထားခြင်းမရှိကြ။ ထိုအဖြစ်ကြောင့် နီဘာရန်း၏ စိတ်ထားသည် တစ်မျိုးတစ်ဖုံ ပြောင်းလဲသွားကာ အိမ်တွင်းရေးသည်လည်း ကပြောင်းကပြန် ဖြစ်သွားခဲ့သည်။ လူ့စိတ်သည် ထိုမျှပြောင်းလဲတတ်သော သဘော၊ ထိုမျှ သောင်းကျန်းတတ်သော သဘောရှိသည်ကို နီဘာရန်းတစ်ခါမျှ မစဉ်းစားမိခဲ့။ ထိုစိတ်မျိုးကာ ဆင်ရိုင်းကဲ့သို့ သောင်းကျန်းလေစွ။ စနစ်တကျရှိ၍ သာယာသော ဘ၀တစ်ခုကို ဖရိုဖရဲဖြစ်အောင် ဖျက်ဆီးတတ်လေစွ။
နီဘာရန်းသာလျှင် စိတ်ဆင်းရဲရသည် မဟုတ်။ ဟာရာရှန္ဒရီမှာလည်း စိတ်ဒုက္ခရောက်ရသည်။ မိမိသည် အဘယ့်ကြောင့် နေမထိထိုင်မသာ ဖြစ်နေရသနည်း။
အဘယ့်ကြောင့် ထိုမျှဆင်းရဲဒုက္ခရောက်နေရသနည်း ...
ယခု သူတောင့်တနေသောအရာကို ယခင်က သူတစ်ခါမျှ ဂရုထားမိခြင်း မရှိ။ တစ်ခါမျှ အရေးထားခဲ့မိခြင်း မရှိ။ အလျင်တုန်းက နီဘာရန်း ရုံးသွားစဉ် သူနှင့်အတူ အိပ်ရာဝင်ချိန်တုန်းဆိုလျှင် သူတို့နှစ်ယောက်သည် နွားနို့ဖိုး၊ အိမ်စရိတ်၊ ကုန်ဈေးနှုန်း၊ သာရေးနာရေး ကိစ္စစသည်တို့ကို ဆွေးနွေးကြသည်။
ထိုစဉ်တုန်းကမှ ယခုလို ရင်ထဲမှာ ဗလောင်ဆူသည့် အဖြစ်မျိုးကို မကြုံစဖူး။ သူတို့ လင်မယားသည် တစ်ဦးကို တစ်ဦး ချစ်ခဲ့ကြသည့်တိုင် ထိုစဉ်က ရမ္ကက်မီးလျှံဟူ၍ မရှိခဲ့။ ထိုစဉ်က သူတို့အချစ်သည် မီးမညှိရသေးသည့် မီးစာပုံ အစုအထွေးကဲ့သို့ ဖြစ်ခဲ့သည်။
ယခုမူ တစ်စုံတစ်ယောက်သည် ၀င်ရောက်လာကာ သူ့ထံမှ အထွတ်အမြတ်ထားသည့်အရာကို လုယူသွားသည်ဟု ဟာရာရှန္ဒရီ ထင်သည်။ သူ့မိန်းမဘ၀သည် ထာဝရခန်းခြောက်သွားကာ ညှိုးရော်ကြွေကျသွားခဲ့ပြီဟု ထင်နေသည်။ သူသည် ချက်ရေးပြုတ်ရေးကိစ္စ၊ စာရေးသောက်ရေးကိစ္စ၊ ကွမ်းဆေးကိစ္စတို့ဖြင့် နှစ်ဆယ့်ခုနစ်နှစ်လုံးလုံး အစေခံမကြီးသဖွယ် အချိန်ကုန်ခဲ့ရပြီးနောက် ဘ၀တွင် အမြင့်ဆုံးရောက်နေသည့် အချိန်၌ကာ အပျိုပေါက်စ ကောင်မလေးတစ်ယောက်သည် တစ်ဖက်ခန်းတွင် ရောက်နေကာ ရတနာသိုက်ကို သော့ရိုက်ဖွင့်၍ အိမ်ကြီးရှင်မအဖြစ်ကို ယူနေလေပြီ။
မိန်းမဆိုသည်မှာ အိမ်ဦးနတ်ကို အလုပ်အကျွေးပြုရမည်ဆိုသည်မှာ မှန်ပါ၏၊ သို့ရာတွင် ထိုမျှမကသေးပါ။ အိမ်ကို အုပ်စိုးရန်လည်း ဖြစ်ပါသည်။ သို့ရာတွင် ယခုမိန်းမတစ်ယောက်က အစေခံဖြစ်နေပြီး အခြားမိန်းမတစ်ယောက်က မဟေသီဖြစ်နေလေပြီ။ အစေခံသည် ဂုဏ်သိက္ခာကို ဆုံးရှုံးထားခဲ့ကာ မဟေသီမှာမူ စည်းစိမ်ချမ်းသာကို ရနေလေပြီ။
အမှန်မှာ ရှေလဘာလာကိုယ်တိုင်လည်း ပျော်ပိုက်ခြင်း မရှိပါ။ သူ့ကို နီဘာရန်းက အလေးပေးဂရုစိုက်လွန်းသဖြင့် ရှေလဘာလာတွင် အချစ်အတွက် အချိန်မရှိတော့ပါ။ မြစ်သည် မြစ်ကြောင်းအတိုင်း စီးဆင်းသွားကာ ပင်လယ်နှင့်ပေါင်းဆုံသည့်အခါတွင် မြစ်ဖြစ်ရခြင်း ရည်ရွယ်ချက်သည်လည်း ပြီမြောက်ပါသည်။ သို့ရာတွင် ပင်လယ်သည် ဒီရေကြော့် အမြဲတစေ မြစ်ထဲသို့ ၀င်လာသည့်အခါတွင်မူ မြစ်သည်လည်း ဖောက်လှဲဖောက်ပြန်ဖြစ်ကာ ရေလျှံတတ်ပါသည်။
နီဘာရန်း၏ အိမ်မှာလည်း ထိုအတိုင်းပင် ဖြစ်နေပါသည်။ နီဘာရန်းမှအစ တစ်အိမ်လုံးက သူ့ကို ဖူးဖူးဖှုတ်ထားကြသည့်အတွက် ဘ၀င်မြင့်ခဲ့ပါသည်။ လောကကြီးတစ်ခုလုံးသည် သူ့စိတ်တိုင်းကျဖို့ ပေါ်ပေါက်လာရခြင်း ဖြစ်ပြီး သူကမူ မည်သူစိတ်တိုင်းကျဖြစ်အောင် လုပ်ဖို့မလိုဟု ထင်ခဲ့ပါသည်။ ထိုသို့အထင်သည် ဘ၀င်ကို ပင့်ပေးပါသည်။ ဤတွင် တွေ့သမျှ မြင်သမျှကို ဘ၀င်မကျ ဖြစ်လာတတ်သည်။
တစ်နေ့တ၊ွင်မူ ကောင်းကင်သည် မိုးတိမ်တို့ဖြင့် မည်းမှောင်လျက်ရှိ၏။ အိမ်ထဲတွင်လည်း မှောင်လျက်ရှိသဖြင့် အလုပ်ကိုပင် ကောင်းကောင်းလုပ်၍မရ။ မိုးသည် သဲသဲမဲမဲ ရွာချနေ၏။ သပြေပင်ကြီး အောက်မှ ပေါင်းပင်မြက်ပင်များမှာ ရေအောက်တွင် ရောက်နေသည်။ ပြိုကျနေသော အုတ်နံရံအနီးတ၀ိုက်တွင် ညစ်ပတ်နောက်ကျိနေသော ရေများသည် တဝေါဝေါစီးဆင်းနေကြသည်။ ဟာရာရှဒ္ဒရီသည် သူ့အိပ်ခန်းသစ်ပြတင်းပေါက်အနီးတွင် ထိုင်နေသည်။
နီဘာရန်းသည် အခန်းဝသို့ တိတ်တဆိတ်ရောက်လာကာ အခန်းထဲဝင်ရမည်လားဟု စဉ်းစားနေသည်။ ဟာရာရှန္ဒရီသည် အခန်းဝတွင် နီဘာရန်းရောက်နေသည်ကို သတိပြုမိသည်။ သို့ရာတွင် စကားတစ်လုံးမျှ မပြော။ နီဘာရန်းသည် အခန်းထဲသို့ ရုတ်တရက် ၀င်ရောက်လာကာ အမောတကော ပြောသည်။
“မင်းလက်ဝတ်လက်စားတွေ ပေးစမ်းကွာ။ ငါ့မှာ အကြွေးသိပ်များနေတယ်။ ကြွေးရှင်တွေကလည်း တကျည်ကျည် လုပ်နေကြတယ်။ ငါ ပေါင်ပြီး ဆပ်လိုက်ချင်တယ်။ ငါ ပြန်ရွေးပေးပါ့မယ်၊ မကြာပါဘူး”
ဟာရာရှန္ဒရီက မည်သို့မျှမဖြေ။ နီဘာရန်းသည် ရာဇ၀တ်သားတစ်ဦးလို ရပ်နေသည်။ အတန်ကြာသည့်အခါမှ သူက ခပ်တိုးတိုးမေးသည်။
“ဘယ့်နှယ့်လဲ ... မပေးနိုင်ဘူးလား”
“ဟင့်အင်း ......... မပေးနိုင်ဘူး”
အခန်းထဲသို့ ၀င်လာရသည်မှာ လွယ်သလောက် ပြန်ထွက်သွားရသည်မှာ ခက်နေသည်။ နီဘာရန်းသည် တောင်ကြည့် မြောက်ကြည့်လုပ်နေပြီး “ဒီလိုဆိုရင်လည်း တခြားက ရှာရမှာပေါ့”ဟု ဆိုကာ ခပ်သုတ်သုတ် ပြန်ထွက်သွားသည်။
နီဘာရန်းတွင် ကြွေးရှိနေကြောင်း တစ်နေ့နေ့တွင် သူ့လက်ဝတ်လက်စားများကို ပေါင်မည်ဖြစ်ကြောင်းကို ဟာရာရှန္ဒရီ သိပြီးသား ဖြစ်သည်။ မနေ့ညတုန်းကပင် အပိုးကျိုးနေသော သူ့ယောက်ျားကို ရှေလဘာလာ ပူဆာခဲ့သေးသည်။
“အစ်မကြီးတို့မှာတော့ စိန်တွေရွှေတွေကို ညွတ်နေတာပဲ။ ကျွန်မမှာတော့ ဘာမှမရှိဘူး” ဟု ပြောသံကို ကြားရသည်။
ဟာရာရှန္ဒရီသည် ဖြည်းညင်းစွာထကာ မီးခံသေတ္တာကို ဖွင့်သည်။ အထဲမှ လက်ဝတ်ရတနာများအားလုံးကို တစ်ခုပြီးတစ်ခု ထုတ်သည်။ ရှေလဘာလာကို ခေါ်ပြီးနောက် သူလက်ထပ်တုန်းက ၀တ်သည့် ဗာရာဏသီဆာရီကို ခြုံပေးသည်။ ထုတ်ထားသည့် လက်ဝတ်ရတနာများ အားလုံးကိုလည်း သူကိုယ်တိုင် ဆင်ပေးသည်။ ထို့နောက် မီးအိမ်ကို ထွန်းပြီး မိန်းကလေး၏ မျက်နှာကို ကြည့်သည်။ မျက်နှာကလေးက ချိုမြရွှန်းလဲ့နေသည်။ မှည့်၍ မွှေးနေသော သစ်သီးတစ်လုံးလို ရွှန်းဆို အပြစ်ကင်းနေသည်။ ရှေလဘာလာ ပြန်ထွက်သွားသည့်အခါ၌ တချွင်ချွင်မြည်နေသော လက်ဝတ်ရတနာတို့၏ အသံများသည် ဟာရာရှန္ဒရီ၏ သွေးထဲတွင် အတန်ကြာမျှ မြည်ဟည်းပဲ့ထပ်နေကြသည်။ ယနေ့တွင်မူ မိမိနှင့် ရှေလဘာလာတို့သည်အကွာကြီး ကွာခြားသွားခဲ့ကြပြီး သို့ရာတွင် သူငယ်ငယ်တုန်းကမူ သူလည်း ထို့အတူ နုပျိုမှုဖြင့် ရွှန်းသစ်နေခဲ့သည်။ ထိုစဉ်တုန်းက သူ့ကို မည်သူကမျှ သူ့အကြောင်းကို ရှင်းလင်းမပြခဲ့ကြ။
သူ့ အလှကျက်သရေဖြိုးဝေချိန်သည် ကုန်လွန်သွားခဲ့ပြီ။ ထိုစဉ်တုန်းကမူ သူ သတိမထားမိခဲ့။ ယခုနုပျိုမှုဖြင့် ဂုဏ်မောက်နေသော ရှေလဘာလာကိုမြင်မှ သူ သတိပြုမိတော့သည်။ ရှေလဘာလာသည် လှိုင်းလုံးကလေးတစ်လုံးကို လှုပ်ရှားနေသည်။
ဟာရာရှန္ဒရီသည် အိမ်မှုကိစ္စလောက်ကိုသာ အလေးထားနေသဖြင့် သူအဖို့ ထိုလက်ဝတ်ရတနာများသည် ဘာအဓိပ္ပယ်မျှ မရှိ၊ လက်ဝတ်ရတနာများကို တစ်ခဏအတွင်း စွန့်လွှတ်ပစ်လိုက်ခြင်းမှာ မိုက်မဲရာတော့ ရောက်ကောင်းရောက်မည်။ သို့ရာတွင် ဟာရာရှန္ဒရီသည် အိမ်မှုကိစ္စထက် အရေးကြီးသည့်ကိစ္စတစ်ခုကို သိခဲ့သည့်အတွက် ထိုသို့သော လက်ဝတ်ရတနာများ၊ အိမ်မှုကိစ္စများသည် သူ့အဖို့ အသေးအဖွဲများ ဖြစ်သွားခဲ့လေပြီ။
ပြိုးပြက်တောက်သော လက်ဝတ်ရတနာတို့ကို ဆင်မြန်း၍ အိပ်ခန်းဆီသို့ ပြန်လာသော ရှေလဘာလာမှာမူ ထိုရတနာများသည် မည်မျှ တန်ဖိုးရှိသည် မရှိသည်ကို တစ်ချက်ကလေးမှ မစဉ်းစားမိ။ သူသိသည်မှာ အချိန်တန်သည်နှင့် ထိုရွှေ၊ ထိုဂုဏ်သိက္ခာ၊ ထိုစည်းစိမ်ဥစ္စာ ဟူသမျှတို့သည် သူ့လက်ထဲသို့ မုချဆတ်ဆတ်ရောက်လာမည် ဆိုသည့်အချက်သာ ဖြစ်သည်။ အကြောင်းမူ သူသည် ရှေလဘာလာဖြစ်သောကြောင့်ဖြစ်သည်။ တစ်အိမ်လုံး၏ အချစ်တော်ဖြစ်သောကြောင့် ဖြစ်သည်။
အိပ်မက်ထဲတွင် သူသူကိုယ်ကိုယ် အကြောက်အရွံ့မရှိ လမ်းလျှောက်နိုင်ကြသည်။ မည်မျှကြောက်စရာကောင်းသော လမ်းမျိုးကို ဖြစ်စေ ဆုတ်ဆိုင်းခြင်းမရှိ။ အိပ်ပျော်ခြင်းမရှိသည့် အချိန်များတွင်လည်း ထိုသို့အကြောက်အရွံ့မရှိ။ အဆင်အခြင်မရှိ လမ်းလျှောက်သူတွေ ရှိတတ်သည်။ သူတို့မှာ ဘေးဒုက္ခကို လှလှကြီး ကြုံတွေ့သည့်အခါမှပင် အိပ်ရာမှ နိုးလာကြသည်။
မက်မိုရန်ကုမ္ပဏီမှ စာရေးကြီး နီဘာရန်းသည်လည်း ထို့အတူပင်။ ရှေလဘာလာဆိုသည့် မိန်းကလေးသည် သူ့ဘ၀ကို ၀င်ရောက်မွှေနှောက်သွားသည့် လေဆင်နှာမောင်းနှင့်တူသည်။ သူသည် သူနှင့် ဘာမျှမသက်ဆိုင်သော အဖိုးတန်ပစ္စည်းများကို စုပ်ယူ သယ်ဆောင်သွားသည်။ ထိုပစ္စည်းများထဲတွင် နီဘာရန်း၏ ဆင်ခြင်တုံတရား၊ နီဘာရန်း၏ ဂုဏ်သိက္ခာ၊ နီဘာရန်း၏လခ၊ ဟာရာရှန္ဒရီ၏ ပျော်ရွှင်မှုနှင့် လက်ဝတ်ရတနာများလည်း ပါသည်။ နီဘာရန်းသည် မက်မိုရန်ကုမ္ပဏီမှ ငွေများကို တိတ်တဆိတ် ထုတ်သုံးသည်။ တစ်ခါတစ်ရံ ငွေစက္ကူတွေကို တစ်ဝက်ချင်းယူသည်။ တစ်ခါတစ်ရံတွင်လည်း အထုပ်လိုက်ယူသည်။ နောက်လခထုတ်သည့်အခါတွင် ပြန်ထည့်မည်ဟု စိတ်ကူး၍ ယူခြင်းဖြစ်သည်။ သို့ရာတွင် နောက်လခမှာလည်း လေဆင်နှာမောင်း၏ ဗဟိုချက်ထဲတွင် စုံးစုံးမြုပ်သွားသည်။ ခဏမျှ ပြိုးပြက်နေသော မူးစေ့တစ်စေ့ပင် မချန်။ လေဆင်နှာမောင်းထဲတွင် ပျောက်ကွယ်သွားတော့သည်။
နောက်ဆုံးတွင် နီဘာရန်း၏ကိစ္စသည် ဘူးပေါ်သလို ပေါ်သွားသည်။ သူ့ရာထူးမှာ မိဘအစဥင်္်အဆက်ကြောင့် ရသော ရာထူးဖြစ်သည်။ အထက်လူကြီးက သူ့ကို သနားသဖြင့် ငွေရှာပြီး ပြန်သွင်းရန် နှစ်ရက် အချိန်ပေးသည်။ သူ ယူသုံးသည့် ငွေမှာ နှစ်ထောင့်ငါးရာရှိသည်ကို တွေ့ရသည့်အခါတွင် အံ့သြနေသည်။ သည်မျှလောက်များသည့် ငွေကို ဘယ်လိုလုပ် ကုန်သွားသည်ကို စဉ်းစားမရအောင် ဖြစ်နေသည်။ “ငါတော့ ခွေးဖြစ်ပြီ”ဟု ဟာရာရှန္ဒရီ၏ ရှေ့တွင် အရူးသဖွယ် ညည်းမိသည်။
ဟာရာရှန္ဒရီမှာလည်း အဖြစ်အပျက်တစ်ခုလုံးကို နားထောင်ပြီးနောက် မျက်နှာဖြူဖပ်ဖြူလျော် ဖြစ်နေသည်။
“မင်း လက်ဝတ်လက်စားတွေပေးပါဦး”ဟု တောင်းသည်။
“ဘယ်မှာ ရှိတော့လို့လဲ။ ကောင်မလေးကို အကုန်ပေးလိုက်ပြီ“
နီဘာရန်းသည် ကလေးတစ်ယောက်လို ဖြစ်နေသည်။
“ခက်တာပဲကွာ။ ဘာဖြစ်လို့ အကုန်ပေးလိုက်ရတာလဲ။ မင်းကို ဘယ်သူက အပေးခိုင်းလို့လဲ”
“ပေးလိုက်တော့ ဘာဖြစ်သလဲရှင် ရေထဲ ပစ်ချတာမှ မဟုတ်တာ”
သတ္တိကြောင်သော နီဘာရန်းသည် ဆုတ်ဆိုင်းဆိုင်းဖြင့်
“သွားကွာ အကြောင်းတစ်ခုခုပြပြီး ပြန်တောင်းချေ။ ငါက အတောင်းခိုင်း လိုက်တာလို့တော့ မပြောနဲ့နော်။ အကြောင်းကိုလည်း မပြောနဲ့”
ဟာရာရှန္ဒရီသည် သူ့ယောက်ျား၏ ဖြစ်ပုံကိုမြင်သည့်အခါတွင် စက်လည်း စက်ဆုပ်သည်။ ဒေါသလည်း ထွက်သည်။
“ဘာ ဟန်ဆောင်ပြီး အကြောင်း ပြရမှာလည်း ရှင့်။ အမှန်အတိုင်း ဖွင့်ပြောရမှာပေါ့။ ဒီလောက်ကိစ္စများနေတဲ့အထဲမှာ ဟန်ဆောင်ပန်ဆောင်တွေ ဘာလုပ်နေစရာရှိသလဲ။ လာလိုက်ခဲ့”
ဟာရာရှန္ဒရီသည် သူ့ကို ဒုတိယမယား၏ အခန်းထဲသို့ ခေါ်သွားသည်။
ရှေလဘာလာသည် အကျိုးအကြောင်းပြောပြသည်ကို လက်မခံ၊ ဘာတွေပြောပြော ဘယ်လိုနားချချ “ဒါဟာ ကျွန်မ ဘယ်သိမလဲ”ဟူသော စကားဖြင့်သာ တုံ့ပြန်သည်။
သူ့နောက်ကို လိုက်လာခဲ့စဉ်က အိမ်တွင်းရေးကိစ္စများတွင် အခြားသူများနှင့်အတူ အေးအတူပူအမျှ ခံမည်ဟု သူမပြောဖူးခဲ့။ လူတိုင်း ကိုယ့်ကိစ္စကို ကိုယ်ဘာသာ ကိုယ်ဖြေရှင်းရမည် မဟုတ်လော။ မိမိသည် ဤအိမ်တွင် ခြေမွေးမီးမလောင် လက်မွေးမီးမလောင် နေရန် ရောက်လာခြင်း မဟုတ်လော။ ယခုမှ အိမ်သားတွေနဲ့အတူ အေးအတူ ပူအမျှ ခွဲဝေခံစးရမည်ဟု ဆိုလာခြင်းမှာ နည်းနည်းမျှ မတရားဟု သူထင်သည်။
နီဘာရန်းသည် ရှေလဘာလာ၏ ခြေရင်းတွင်ထိုင်၍ ငိုနေသည်။ ရှေလဘာလာကမူ “ဒါတွေ ကျွန်မ မသိဘူးလေ။ ကျွန်မနဲ့ ဘာဆိုင်တာ မှတ်လို့၊ ဒီပစ္စည်းတွေကို ဘယ်နှယ့်လုပ်ပေးလို့ ဖြစ်မလဲ”ဟုသာ တွင်တွင် ပြောနေသည်။
နူးညံ့ပျော့ပြောင်း၍ ကြင်နာသနားတတ်ဟန်ရှိသော ရှေလဘာလာသည် မီးခံသေတ္တာကြီးထက် ခိုင်ခန့်ကြောင်း နီဘာရန်း သဘောပေါက်သွားသည်။ ဟာရာရှန္ဒရီမှာ ထိုကိစ္စတွင် သူ့ယောက်ျား ပျော့ညံ့သည့်အဖြစ်ကို မျက်ဝါးထင်ထင် မြင်သွားကာ စက်ဆုပ်ရွံရှာခြင်း ဖြစ်မိသည်။ ဟာရာရှန္ဒရီသည် ရှေလဘာလာ၏လက်မှ သော့ကို ၀င်လုသည်။ ရှေလဘာလာက သော့တွဲကို အုတ်တံတိုင်းအပြင်ဘက် ကန်ကလေးထဲသို့ လွှင့်ပစ်လိုက်သည်။
“ဒီလိုဆို သော့ခလောက်ကို ဖျက်”ဟု ဟာရာရှန္ဒရီက ခြေမကိုင်မိ လက်မကိုင်မိ ဖြစ်နေသော သူ့ယောက်ျားကို ပြောသည်။
“ဖျက်ရဲဖျက်ကြည့်လေ။ ဒီကောင်မက ဆွဲကြိုးချသေပစ်လိုက်မယ်”ဟု ရှေလဘာလာက တည်ငြိမ်စွာ ပြောသည်။
“နေကွာ၊ ဒီလိုဆိုရင်လဲ အမေ့ဆီသွားပြီး လှည့်ရမှာပဲ” ဟုဆိုကာ နီဘာရန်းသည် အခန်းထဲမှ ပြေးထွက်သွားသည်။ နှစ်နာရီအတွင်း၌ကာ နီဘာရန်းသည် ဘိုးဘွားများနေထိုင်ခဲ့သော သူတို့အိမ်ကို နှစ်ထောင့်ငါးရာနှင့် ရောင်းပြီးခဲ့လေပြီ။
ဤသို့ဖြင့် လက်ထိပ်နှင့် သီသီကလေး လွဲခဲ့သည်။ သို့ရာတွင် အလုပ်မှ ပြုတ်လာခဲ့သည်။ သူသည်ပြောင်းရွှေ့နိုင်သော ပစ္စည်း၊ မပြောင်းရွှေ့နိုင်သော ပစ္စည်းဟူသမျှတို့အနက် မယားနှစ်ယောက်သာ ကျန်ရစ်ခဲ့သည်။ ထိုမယားနှစ်ယောက်အနက် ဂြိုဟ်မွှေသည့် မယားငယ်ကလေးမှာ ကိုယ်ဝန်ရှိလာသဖြင့် မရွှေ့ပြောင်းနိုင်သော အသွင်အပြင်ကို ပို၍ဆောင်လာသည်။ သူတို့အိမ်ထောင်သည် လမ်းကြားကလေးတစ်ခုထဲရှိ အိမ်အိုကလေးတစ်လုံးသို့ပြောင်းလဲလာခဲ့ကြသည်။
ရှေလဘာလာ၏ ဆင်းရဲဒုက္ခတို့မှ ဤတွင်မရပ်ဝေး။ သူ့ယောက်ျားသည် သူတို့ကို တင့်တောင့်တင့်တယ် မထားနိုင်ဆိုသည့် အချက်ကို လက်မခံ။ ဤသို့တင့်တောင့်တင့်တယ် မထားနိုင်လျှင် အဘယ့်ကြောင့် မယားနစ်ယောက် ယူခဲ့သေးသနည်း။
သူတို့အိမ်ကလေးမှာ အပေါ်ထပ်တွင် ရှိပြီး အခန်းနှစ်ခန်းသာ ရှိသည်။ တစ်ခန်းမှာ သူနှင့် နီဘာရန်းတို့ အိပ်ော အခန်းဖြစ်သည်။ “နေ့ရောညရော အိပ်ခန်းထဲ အောင်းနေရတော့မှာလားရှင့်”ဟု ရှေလဘာလာက ညည်းသည်။ ထိုအခါတွင် နီဘာရန်းကလည်း “ငါအိမ်ရှာနေပါတယ်ကွာ။ မကြာခင်ရတော့မှာပါ”ဟု ချွေးသိပ်တတ်သည်။
“ဟိုဘက်အိမ် အားနေတာပဲ အဲဒီအိမ်ကို ပြောင်းပါလား”
ရှေလဘာလာသည် နေရာဟောင်းတွင် မနေချင်။ အိမ်နီးချင်းဟောင်းများနှင့် မျက်နှာချင်း မဆိုင်ချင်။ အိမ်နီးချင်းများသည် နီဘာရန်း၏ အကြောင်းကို ကြားသိရသည့်အခါတွင် စိတ်မကောင်းဖြစ်ကာ လာရောက်မေးမြန်းကြသည်။ ထိုအခါမျိုးတွင် ရှေလဘာလာသည် အခန်းတံခါးကိုပိတ်ပြီး အခန်းအောင်းနေသည်။ ခေါ်လျှင်လည်း ထွက်မလာ။ ဧည့်သည်တွေ ပြန်သွားသည်နှင့် ရှေလဘာလာသည် အော်လားဟစ်လား လုပ်သည်။ ငိုလားယိုလား လုပ်သည်။ စိတ်ကောက်ပြီး ထမင်းမစားဘဲ နေသည်။ သူစိတ်ဆိုးနေကြောင်းကို အရှေ့ခုနစ်အိမ် အနောက်ရှစ်အိမ် သိအောင် လုပ်သည်။ ဤသည်မှာ တစ်ခါမဟုတ်၊ အခါခါဖြစ်သည်။
နောက်ဆုံးတွင် ရှေလဘာလာသည် အကြီးအကျယ်နာမကျန်းဖြစ်ကာ ကိုယ်ဝန်ပျက်ကျတော့မလို ဖြစ်နေသည်။ နီဘာရန်းက မယားကြီး၏ လက်ကို ဆုပ်ကိုင်ကာ “မင်း မကယ်နိုင်တော့ဘူးလားကွာ”ဟု မေးသည်။
ဟာရာရှန္ဒရီသည် နေ့ရောညပါ ပြုစုစောင့်ရှောက်၏။ တစ်ခုခုကို စိတ်တိုင်းမကျလျှင် ရှေလဘာလာသည် သူ့ကို ဆဲရေးတိုင်းထွာခြင်း ပြုသည့်တိုင် ခွန်းတုံ့ပြန်ခြင်း မပြု။ ရှေလဘာလာသည် ဘာလီရည်ကို မသောက်။ အဖျားတက်နေစဉ်တွင် ထမင်းနှင့်သရက်သီးသနပ်ကို စားမည်ဟု တဖွဖွတောင်းနေသည်။ တောင်းသည်ကို မရလျှင် အော်ကြီး ဟစ်ကျယ်လုပ်ပြီး သောင်းကျန်းတော့သည်။ သို့ရာတွင် ဟာရာရှန္ဒရီသည် သူ့ကို ကလေးငယ်တစ်ယောက်လို ချော့မော့ဖျောင်းဖျသည်။ ကလေးမရယ်။ ညီမရယ်စသည်ဖြင့် ချိုသာစွာ ခေါ်သည်။
ရှေလဘာလာသည် သက်ဆိုးမရှည်ရှာပါ။ သူ့ကို ချစ်ခင်ယုယသည့် ပတ်ဝန်းကျင်တွင် ကျင်လည်ပြီးနောက် တိုတောင်း၍ အချည်းအနှီးဖြစ်သော ဆူပူသောင်းကျန်းသည့်ဘ၀ကို စွန့်လွှတ်သွားခဲ့ပါသည်။
ပထမတွင် နီဘာရန်းသည် ဆောက်တည်မရဖြစ်သည်။ သို့ရာတွင် သံခြေကျင်းကြီးတစ်ခု ကျိုးပဲ့သွားပြီဆိုသည်ကို မကြာမီတွင် သဘောပေါက်လာသည်။ ပူဆွေးသောကဖြစ်သည့်တိုင် လွတ်မြောက်မှု ရသွားသည်ဟု ခံစားရသည်။ နီဘာရန်းသည် ရွှန်လန်းတက်ကြွနေလေသည်။ တစ်ခါတစ်ရံတွင်လည်း သူ့ ဘ၀တွင် နွယ်တစ်ခုလို ရစ်ပတ်နေသော ကြိုးတစ်ချောင်း ပြတ်သွားလေပြီ။ သူချစ်ရသော ရှေလဘာလာ တစ်ယောက် မရှိတော့ပြီဟု တွေးမိပြန်ကာ သက်ပြင်းကြီးတစ်ချက်ကို ချမိသည်။ သို့ရာတွင် သေသေချာချာ စဉ်းစားကြည့်သည့်အခါတွင် အမှန်ကို သူမြင်ပါသည်။ ရှေလဘာလာသည် သူ့အဖို့ ကြိုးစင်မှ ကြိုးကွင်းတစ်ကွင်းနှင့် အတူတူပင် ဖြစ်ပါသည်။
သူ့တစ်က်လုံး ပေါင်းခဲ့သည့် ဟာရာရှန္ဒရီကကော။ တကယ်စဉ်းစားကြည့်သည့်အခါတွင် ဟာရာရှန္ဒရီတစ်ယောက်သာလျှင် သူ့အတိတ်ဝတ်ကျောင်းတွင် ဂုဏ်ကျက်သရေရှိသည့် နေရာကို ရထိုက်သူ၊ သူသာလျှင် သူ့ဘ၀တွင် ၀မ်းသာစရာ၊ ၀မ်းနည်းစရာတို့ကို မျှဝေခံစားသူဖြစ်ကြောင်းကို ပို၍သဘောပေါက်လာသည်။ သို့တိုင်အောင် သူတို့နှစ်ဦးကြားတွင် ကွာဟချက်ရှိနေသေးသည်ဟု ထင်နေသည်။ တောက်ပြောင်၍ အကြင်နာကင်းမဲ့သည့် ဓားသွားကလေးတစ်ချောင်းသည် သူ့နှလုံးသားကို ထက်ပိုင်းဖြတ်သွားခဲ့ပြီး အလယ်ခေါင်တွင် ဒဏ်ရာဟတ်တက် ထားပစ်ခဲ့သည့်နှယ် ဖြစ်သည်။
သီတင်းပတ်များစွာအကြာ မြို့ကြီးတစ်မြို့လုံး အိပ်ပျော်နေသည့် ညတစ်ည၌ နီဘာရန်းသည် တစ်ယောက်တည်း အိပ်နေသော သူ့ဇနးသည် ဟာရာရှန္ဒရီ၏ အိပ်ခန်းထဲသို့ တိတ်တဆိတ် ၀င်လာခဲ့သည်။ သူသည် အလျင်တုန်းကလို သူ့ဇနီး၏ ညာဘက်တွင် အသာဝင်အိပ်လိုက်၏။ သို့ရာတွင် တစ်ခါက သူ့နယ်ပယ်ဖြစ်ခဲ့သော ထိုနေရာ၌ သူသည် လူစိမ်းတစ်ယောက်လို ဖြစ်န်ေသည်။
သူတို့နှစ်ယောက်စလုံး စကားတစ်ခွန်းမှ မပြောကြ။ သူတို့နှစ်ယောက်သည် အလျင်တုန်းကလိုပင် ဘေးချင်းယှဉ်၍ လှဲနေကြသည်။ သို့ရာတွင် ကွယ်လွန်သွားသည့် မိန်းကလေးသည် သူတို့ကြားထဲသို့ ရုတ်တရက် ရောက်လာခဲ့သည်။
သူတို့နှစ်ယောက်စလုံးသည် မိန်းကလေး၏ အရိပ်ကို မကျော်နိုင်ဘဲ ဖြစ်နေကြသည်။
(Rabindranath Tagore ၏ The Girl Between ကို ပြန်ဆိုသည်။)
မြသန်းတင့်
ရင်ခုန်ပွင့်၊ ၁၉၉၃ ခုနှစ်၊ မတ်လ။
သူသည် အိပ်ရာမှစောစောစီးစီးထပြီး လမ်းသွယ်ကလေးကို မျက်နှာမူနေသည့် အိမ်ရှေ့တံခါးပေါက်တွင် ထိုင်ကာ တမာကူအိုးကို ရှူသည်။ လမ်းပေါ်တွင် လူတွေဥဒဟိုသွားလာနေကြသည်။ သူတောင်းစားများက သီချင်းဆိုသွားကြသည်။ အထမ်းသည်တစ်ယောက်က ပုလင်းဟောင်းများကို အော်ဝယ်နေသည်။ ထိုသို့အမျိုးမျိုးပြောင်းလဲနေသော ရှုခင်းတို့သည်သူ့ကို ဆွဲဆောင်ခြင်းငှာ မတတ်နိုင်ကျကုန်။ သရက်သီးသည်တို့၊ ငါးသည်တို့လာသည့်နေ့မျိုးကျမှသာလျှင် နီဘာရန်းသည် အချိန်ကြာမြင့်စွာ ဈေးဆစ်ပြီးနောက် နည်းနည်းပါးပါး ၀ယ်လိုက်သည်။ ယင်းမှာ ညနေစာကို ကောင်းကောင်းစားတော့မည်ဆိုသည့် သဘောဖြစ်သည်။ အချိန်ကျသည်နှင့် သူသည် ကိုယ်ကိုဆီလိမ်းပြီးနောက် ရေချိုးသည်။ နံနက်စာကို စားသည်။ ကြိုးတန်းပေါ်တွင် လွှားတင်ထားသည့် အပေါ်အင်္ကျီကို ၀တ်သည်။ တမာကူကို တစ်ရှူ၊ နှစ်ရှူသည်။ ကွမ်းယာ နောက်တစ်ယာကို ပါးစပ်ထဲငုံပြီး ရုံးသို့ ထွက်လာခဲ့သည်။ ညနေဆိုလျှင် အိမ်နီးချင်းဖြစ်သည့် ဂို့ရှ်၏ အိမ်တွင် ထွေရာလေးပါး ပြောသည်။ ညနေမိုးချုပ်အိမ်ပြန်ရောက်လျှင် ထမင်းစားသည်။ ထို့နောက် ဇနီးသည် ဟာရာရှန္ဒရီနှင့်အတူ အိပ်ရာသို့ဝင်သည်။
လင်မယားနှစ်ယောက် အိပ်ရာထဲတွင် ပြောသည့်စကားများမှာလည်း ကဗျာမဆန်လှပါ။ ထိုသို့ကဗျာမဆန်သည့်အတွက်လည်း နီဘာရန်း ၀မ်းမနည်းလှပါ။ သူတို့လင်မားပြောသည့် အကြောင်းအရာများမှာ မစ်ထရာ၏မင်္ဂလာဆောင်သို့ မည်သည့်လက်ဖွဲ့မျိုး ပို့သင့်ကြောင်း၊ နောက်ရောက်သည့် အိမ်ဖော်မလေးမည်မျှ ထောင့်မကျိုးကြောင်း၊ မည်သည့်ဟင်းတွင် မည်သည့်အမွှေးအကြိုင်ကို ခတ်သည့်အကြောင်း စသည့်အကြောင်းများ ဖြစ်သည်။
ထို့နောက် တပို့တွဲ-တပေါင်းလောက်တွင် ဟာရာရှန္ဒရီ အကြီးအကျယ်နာမကျန်းဖြစ်သည်။ အဖျားမှာ ကျသည်ဟူ၍ မရှိ ဆရာဝန်က ကွီနိုင်တွေကို များများ တိုက်လေလေ အဖျားမှာလည်း တက်သည်ထက် တက်လာလေ ဖြစ်နေသည်။ အချိန်ပြင်းစွာ စီးဆင်းလာသည့် ချောင်းကြီးတစ်ခုကို ဆီး၍တမံတုတ်လိုက်သည်နှင့် တူတော့သည်။ ရက်ပေါင်းလေးဆယ်လုံးလုံး စိုးရိမ်ရသော အခြေအနေတွေ ရှိနေသည်။
နီဘာရန်းသည် ရုံးကိုလည်းမသွားတော့ပြီ။ ဂို့ရှ် အိမ်က ညနေစကားဝိုင်းသို့လည်း မရောက်တော့ပြီ။ နီဘာရန်းသည် ဘာလုပ်၍ ဘာကိုင်ရမည်မသိဘဲ ဖြစ်နေသည်။ ဇနီးသည်၏ အိပ်ရာနားသို့လာကာ လူမမာအခြေအနေကို အကဲခတ်လိုက် ၀ရန်တာက ကုလားထိုင်တွင် ထိုင်ပြီး စိတ်ညစ်ညစ်နှင့် တမာကူကို ရှူလိုက်ဖြင့်သာ အချိန်ကုန်နေသည်။ သူသည် သမားတော်များကို တစ်နေ့လျှင် နှစ်ကြိမ်လဲပြီး အများသူငါပြောကြားသည့် ဆေးဝါးအမျိုးမျိုးတို့ကိုလည်း ရေလဲနှင့်တိုက်၏။ ရက်လေးဆယ် မြောက်သည့်နေ့တွင်မူ ထိုသို့ ဂရုတစိုက်ဖြင့် ကုထုံးမျိုးစုံလက်တန်းစမ်းပြီး သည့်တိုင် လူမမာမှာ မသေမပျောက်ဘဲ နာလန်ထလာခဲ့သည်။ သို့ရာတွင် လူရုပ်မပီတော့။ အိမ်သားများအား အဝေးက ခြောက်ပြနေသော တစ္ဆေတစ်ကောင်နှင့်သာ တူတော့သည်။
ထို့နောက် နွေဦးပေါက်သို့ ရောက်လာခဲ့သည်။ တောင်လေ တိုက်စပြုလာလေသည်။ ပူအိုက်သည့် ထိုညများတွင် လရောင်သည် ဇနီးမောင်နှံတို့၏ အိပ်ခန်းဆောင်များ၊ ကြင်စဦးတို့၏ အိပ်စက်ရာများပေါ်သို့ ဖြာကျစပြုလာလေသည်။
ဟာရာရှန္ဒရီ လဲလျောင်းနေသည့် ကုတင်အနီးရှိ ပြတင်းပေါက်မှ လှမ်းကြည့်လိုက်လျှင် ကျောချင်းကပ် အိမ်၏နောက်ဘေး ပန်းခြံကလေးကို လှမ်းမြင်ရသည်။ ပန်းခြံဆိုသော်လည်း များစွာ သာယာလှသည်ဟု မဆိုနိုင်ပါ။ စိတ်ကူးရတုန်း ကောက်စိုက်ထားပြီး ပြစ်ထားသည့် အပင်ကလေးများသာ ရှိပါသည်။ ဖရုံနွယ်များသည် သစ်ငုတ်တိုကြီးတစ်ခုကို တွယ်တက်နေကြသည်။ သစ်ပင်ပတ်လည်တွင် ပေါင်းပင်များသည် တောထအောင် ပေါက်နေကြသည်။ မီးဖိုအနီးမှ အုတ်ဝန်းထရံမှာလည်း ပြိုကကျပျက်စီးနေပြီး နေ့စဉ်နှင့်အမျှ လာ၍ မီးသွေးမှုများ၊ ပြာမှုန်များ လောင်းထားသဖြင့် အပုံကြီး ဖြစ်နေသည်။
သို့တိုင်အောင် ဟာရာရှန္ဒရီသည် ထိုရှုခင်းကလေးကို ငေးကြည့်ရင်း ကျဉ်းမြောင်းလှသော သူ့ဘ၀တစ်သက်တာတွင် ယခင်က တစ်ခါမျှ မခံစားဖူးခဲ့ရသော ပီတိတစ်မျိုးကို ခံစားနေရသည်။ သူ့စိတ်သည် နွေတွင် ခန်းခြောက်စပြုနေကာ သဲပြင်ပေါ်တွင် စီးဆင်းနေသည့် စမ်းချောင်းကလေးတစ်ခုလို ဖြစ်နေရသည်။ ချောင်းကလေးသည် သေးမျှင်သည့်ရေစီးကြောင်းကလေးတစ်ခုလို ဖြစ်သွားကာ ကြည်လင်နေသည်။ မနက်ခင်းနေခြည်များသည် ချောင်းကလေးပေါ်သို့ ဖြာကျလာသည်။ လေညင်းက ရေပြင်ကို ပွတ်သပ်ပေးနေသည်။ ညဆိုလျှင် ကြယ်ပွင့်များသည် ကြည်နူးစရာကောင်းသော အတိတ်အဖြစ်အပျက်များ အရိပ်ထင်သည့်ပမာ ရေထဲတွင် လာ၍ အရိပ်ထင်ကျသည်။ မမြင်ရသော လက်ချောင်းများသည် သူ့ရင်ထဲရှိ သေးမျှင်သော စောင်းကြိုးလေးများကို လာ၍ တီးခတ်သည့်နယ်ရှိကာ ပြောမပြတတ်သော ဂီတသံတစ်မျိုးကို ကြားရသည်ဟု စိတ်တွင် ထင်မိသည်။
ထိုသို့သောအခါမျိုးတွင် အနီးရှိ ခင်ပွန်းဖြစ်သူက ဘယ်နှယ့်နေသေးသလဲ၊ သက်သာရဲ့လားဟု မေးလိုက်လျှင် သူ့မျက်လုံးများထဲတွင် မျက်ရည်များသည်အလိုလိုပဲ လာတတ်ကြသည်။ သေးသွယ်ချောင်ကျနေသည့် မျက်နှာပေါ်တွင် မျက်ရည်ပေါက်များသည် ပြည့်လျှံလျက်ရှိသည်ဟု ထင်ရကာ ဖျော့တော့သည့် သူ့လက်ကိုကိုင်ထားသည့် သူ့ယောက်ျား၏မျက်နှာကို မော့ကြည့်လိုက်ရင်း ကျေးဇူးတင်ခြင်း၊ ချစ်ခင်ခြင်း စသည့် ခံစားချက်များသည် ရင်ထဲတွင် အလျှိုလျှိုပေါ်လာကြသည်။ ထိုအခါတွင် ခင်ပွန်းဖြစ်သူ နီဘာရန်း ရင်ထဲတွင် ယခင်က ခံစားရခဲ့ဖူးသော ကြည်နူးဝမ်းသာမှုတစ်မျိုးသည် အလိုလိုပေါ်ပေါက်တတ်သည်။
ထိုသို့သော ကြည်နူးမျိုးသည် အချိန်တန်ကြာသည့်အထိ ရှိနေတတ်သည်။
တစ်ည၌ လပြည့်ဝန်းကြီးသည် အုတ်နံရံအနီးတွင် ပေါက်နေသော တည်ပင်ခြောက်ကြီးနောက်မှ တငြိမ့်ငြိမ့် ထွက်ပေါ်လာစဉ် လေရူးကလေးသည် တသုန်သုန် တိုက်ခတ်နေသည်။ တိတ်ဆိတ်နေသော ညတွင် သစ်ကိုင်းများသည် သက်ပြင်းချနေကြသည်။
ဟာရာရှန္ဒရီသည် ခင်ပွန်းဖြစ်သူ၏ ဆံပင်များကို လက်ချောင်းများဖြင့် အသာဖွပေးရင်း .....
“ကျွန်မမှာ သားသမီးမရနိုင်တော့ဘူး။ ရှင်လဲ နောက်တစ်ယောက် ထပ်ယူပါလား”ဟု ပြောသည်။
ဟာရာရှန္ဒရီသည် ထိုစကားကို မကြာခဏပြောတတ်သည်။ စိတ်သည် ပျော့ပျောင်းကြည်နူးကာ အချစ်ဝင်နေသည့်အချိန်၌ အရာရာကို လုပ်နိုင်သည်ဟု ထင်တတ်ကြသည်မှာ ဓမ္မတာ ဖြစ်သည်။ ထိုအချိန်က ဟာရာရှန္ဒရီ၏ စိတ်ထဲတွင် အနစ်နာခံလိုစိတ်သည် အရှိန်ကြီးမားနေသည်။ လှိုင်းလုံးသည် ကျောက်ဆောင်ကျောက်ကမ်းပါးတို့ကို အဆက်မပြတ်ရိုက်ခတ်သကဲ့သို့ စိတ်နှလုံးနူးညံ့ခြင်း၊ ကြည်နူးခြင်း၊ အနစ်နာခံခြင်းစသည့် စိတ်ဓာတ်တို့သည်လည်း စုပေါင်းကာ စွန့်လွှတ် အနစ်နာခံသောကိစ္စကို ပြုလုပ်ရန် တိုက်တွန်းနှိုးဆော်လျက်ရှိသည်။
ဟာရာရှန္ဒရီ၏ စိတ်ထဲ၌ ငါ သူ့ကို လေးစားတယ်။ ကြည်ညိုတယ်။ ဒါကြောင့် သူ့အတွက် တစ်ခုခုတော့ လုပ်ပေးသင့်တယ်ဟု ဆုံးဖြတ်လိုက်သည်။ သို့ရာတွင် စိတ်ကူးနှင့် လက်တွေ့ကြားတွင် ကြီးမားသည့် ကွာဟချက်ကြီးရှိတတ်စမြဲ မဟုတ်လော။ မိမိသည် သူ့အတွက် ဘာများထိထိရောက်ရောက် လုပ်ပေးနိုင်ပါသနည်း၊ မိမိတွင် ဥစ္စာပစ္စည်းမရှိ။ သြဇာတိက္ကမမရှိ၊ ပညာမရှိ၊ အသက်တစ်ချောင်းသာလျှင် ရှိသည်။ ထိုအသက်တစ်ချောင်းကို သူ့အတွက် စွန့်လွှတ်ပေးနိုင်လျှင် မည်မျှကောင်းမည်နည်း။
ဟာရာရှန္ဒရီသည် သူ့ယောက်ျားအတွက် ကလေးတစ်ယောက်လောက်တော့ မွေးပေးချင်သည်။ ထိုကလေးသည် ယမင်းရုပ်ကလေး တစ်ရုပ်လို လှပနေရမည်။ ညှစ်ပြီးစနို့လို လတ်ဆတ်နေရမည်။ နို့နှစ်လို နူးညံ့နေရမည်။ မြားနတ်မောင်ကလေးလို ချစ်စရာကောင်းနေရမည်။ သို့ရာတွင် သူ့အသက်ကို စွန့်လွှတ်သည့်တိုင် ထိုသို့သော ကလေးငယ်မျိုးကို သူ မွေးဖွားနိုင်စွမ်းမရှိတော့ပြီ။ ထိုသို့ စဉ်းစားမိသည့်အခါတွင် သူ့ယောက်ျားသည် မိန်းမတစ်ယောက် ထပ်ယူမှ ဖြစ်တော့မည်ဟု သူ သဘောပေါက်လာခဲ့သည်။
မိန်းမများသည် ကိုယ့်ယောက်ျားနောက် မိန်းမယူမည့်အရေးကို ဘာကြောင့်များသည်လောက် စိုးရွံ့ထိတ်လန့် နေကြရသနည်း။ ဘာကြောင့်လောက် ခက်ခဲနေကြရသနည်း။ ကိုယ့်ယောက်ျားကို ကိုယ်ချစ်သည်ဆိုလျှင် က်ုယ့်ယောကျာ်း၏နောက်မယားကိုကော မချစ်နိုင်တော့ပြီလော။
ဟာရာရှန္ဒရီသည် ထိုအတွေးဖြင့် ပျော်နေသည်။
သူ့ဇနီးထံ ထိုစကားမျိုးကို ပထမဆုံး စတင် ကြားရသည့်အခါတွင် နီဘာရန်းသည် ရယ်စရာဟု သဘောထားလိုက်၏။ ဒုတိယနှင့် တတိယ အကြိမ် ကြားရသည့်အခါတွင်လည်း လျစ်လျူရှုလိုက်၏။ သူ့ယောက်ျားက ဆုတ်ဆိုင်းဆိုင်းဖြစ်ကာ လျစ်လျူရှုလေလေ၊ ဟာရာရှန္ဒရီ၏ ယုံကြည်မှုနှင့် ပိုင်းဖြတ်မှုသည်လည်း ကြီးမားလာလေလေ ဖြစ်လာခဲ့သည်။ နီဘာရန်းအဖို့လည်း ထိုစကားကို ကြားရလေလေ ဖြစ်နိုင်သည်ဟု ထင်လာလေလေ ဖြစ်လာခဲ့သည်။ ၀ရန်တာတွင် တမာကူကို ရှူရင်း ကလေးတွေဖြင့် ဆူညံနေသော အိမ်ကလေးကို မြင်ယောင်ကာ ကြည်နူးနေတတ်သည်။
နောင်တွင် နီဘာရန်းသည် ထိုအကြောင်းကို သူကပင် စတင်ပြောလာတတ်သည်။
“အသက်လဲ ကြီးပါပြီကွယ် ... ၊ ဒီအရွယ်ကြီးရောက်မှ မိန်းမငယ်ငယ်ကလေးကို ယူလို့ ဘယ်ဖြစ်မလဲ”ဟု သူက ပြောတတ်သည်။
ဟာရာရှန္ဒရီက သူ့ကို အားပေးသည်။
“အမယ်လေးတော်၊ ဒါအတွက်တော့ ဒီလောက်စိတ်မညစ်ပါနဲ့၊ သူ့ကို ကျွန်မကပဲ သွန်သင်ဆုံးမရမှာပေါ့၊ ကျွန်မ တာဝန်ထားလိုက်ပါ”ဟု ပြောတတ်သည်။
သားသမီး မရှိသည့် ဟာရာရှန္ဒရီသည် အမိရင်ခွင်မှ လွတ်ကာစ ရှက်ရွံ့ရွံ့ အပျိုပေါက်သတို့သမီးကလေးကို မြင်ယောင်ကာ စိတ်ထဲတွင် ကြည်နူးနေသည်။
“ငါ့မှာ ရုံးအလုပ်ရှိသေးတယ်ကွ၊ ပြီးတော့ ဗာဟီရတွေကလည်း တစ်ပုံကြီး၊ မဖြစ်ပါဘူးကွာ၊ ကောင်မလေး နွဲ့ဆိုးဆိုးတာ၊ ပူဆာတာတွေကို ငါ မခံနိုင်ပါဘူး၊ အချိန်ကုန်ပါတယ်”
နီဘာရန်းက ပြောသည်။
“ဘာဖြစ်လို့ အချိန်ကုန်ရမှာလဲရှင့်။ အခု ကျွန်မ မသေနိုင်သေးတာ တခြားကြောင့် မဟုတ်ဘူးရှင့်။ ရှင့်ကို စိတ်မချလို့၊ ရှင့်အလုပ်တွေ ရှင့်အပေါင်းအသင်းတွေနဲ့ ဘယ်လိုနေကြထိုင်ကြမလဲဆိုတာကို မြင်ပြီးမှ ကျွန်မသေမှာ”
ဟာရာရှန္ဒရီက နောက်တရွှတ်ရွှတ် ပြောသည်။ နီဘာရန်းက အပြစ်ဆိုသည့်ဟန်ဖြင့် ဇနီးသည်၏ ပါးပြင်ကို လက်ချောင်းကလေးဖြင့် အသာအယာ တောက်နေသည်။
နီဘာရန်းသည် နောက်မိန်းမတစ်ယောက် ယူဖြစ်သွားသည်။ ကောင်မလေးက နုနုနယ်နယ်ကလေး ပါးပြင်တွင် မျက်ရည်စကလေးတွေနှင့် နှာခေါင်းပေါ်တွင် ရွှေကွင်းကလေးတွေနှင့် ကောင်မလေး၏အမည်မှာ ရှေလဘာလာ ဖြစ်သည်။ နီဘာရန်းသည် ထိုအမည်ကလေးကို သဘောကျသည်။ ပျိုမြစ်နုနယ်ခြင်းကို နှစ်သက်သည်။ သူ့ခန္ဒာကိုယ်ကလေးကို တစိမ့်စိမ့်ကြည့်နေချင်သည်။ သူ့မျက်နှာကလေးပေါ်က အမူအရာတွေကို မြင်နေချင်သည်။ သူ့လှုပ်ရှားဟန်ကလေးတွေကို ကြည့်နေချင်သည်။ သို့ရာတွင် နီဘာရန်းတွင် အခွင့်မရရှာ၊ ထိုအစား သည်ကောင်မလေးကြောင့် ကြီးတောင့်ကြီးမားအရွယ် ရောက်မှ ဒုက္ခရောက်ရလေဟန်။ “လွဲမရှောင်သာ၍ သည်ကောင်မလေးကို ယူရလေဟန်။ ကောင်မလေးထက် အခြားသောကိစ္စများကို ဂရုစိုက်နေလေဟန်ဆောင်၍ နေရလေသည်။
ဟာရာရှန္ဒရီသည် သူ့ယောက်ျား နီဘာရန်း၏ ဖြစ်ပုံကို သတိပြုမိသည်။ ထိုအဖြစ်ကိုကြည့်၍ စိတ်ထဲက ကျိတ်၍ ၀မ်းသာမိသည်။ တစ်ခါတစ်ရံတွင် ဟာရာရှန္ဒရီသည် သူ့ယောက်ျားလက်ကို လှမ်းဆွဲလိုက်ပြီး “ရှင်က ဘာဖြစ်လို့ ခပ်ရှောင်ရှောင် လုပ်နေရတာလဲ၊ ကောင်မလေးက ရှင့်ကိုကိုက်စားမှာ မို့လို့လား”ဟု မေးတတ်သည်။
ထိုအခါမျိုးတွင် နီဘာရန်းသည် ခပ်ရှက်ရှက်ဖြင့် “မင်းကလဲ ဘာတွေ လျှောက်ပြောနေတာလဲ၊ ငါ့မှာ အလုပ်ကိစ္စတွေ တစ်ပုံကြီး ရှိနေတယ်”ဟု ဆိုသည်။
နီဘာရန်းသည် ထောင်ချောက်ထဲရောက်နေသူလို ဖြစ်နေသည်။ သူ့ မိန်းမက ရယ်၍ တံခါးကို ပိတ်လိုက်ကာ “ကဲ ... ရှင် ဘယ်ထွက်ပြေးဦးလဲ” ဟု မေးတတ်သည်။ သနားစရာ နီဘာရန်းသည် ရှောင်ပြေး၍ မရတော့ဘဲ သူ့ဇနီးအနားတွင် ၀င်ထိုင်လိုက်ရတော့သည်။ ဟာရာရှန္ဒရီက သူ့ယောက်ျားနားနားသို့ ကပ်ကာ ...
“ရှင် ကောင်မလေးကို မိသားဖသားပီပီ တောင်းရမ်းယူခဲ့ပြီးပြီနော်။ သူများ သားသမီးကို အိမ်ခေါ်လာပြီး ပစ်မထားနဲ့”ဟု ပြောတတ်သည်။ ထို့နောက် ရှေလဘာလာ၏လက်ကိုဆွဲပြီး နီဘာရန်း ဘယ်ဘက်တွင် အထိုင်ခိုင်းသည်။ ရှေလဘာလာကိုလည်း မျက်နှာဖုံးကိုဖွင့်၍ ခေါင်းကို အမော့ခိုင်းသည်။
“ကြည့်စမ်း ကောင်မလေးရဲ့မျက်နှာ၊ ဘယ်လောက်လှသလဲ၊ လမင်းကြီး ကျနေတာပဲ”ဟု နီဘာရန်းကို ပြောတတ်သည်။ သို့မဟုတ်လျှင်လည်း အလုပ်ရှိသည်ဟု အကြောင်းပြကာ သူတို့အနားမှထပြီး အပြင်ဘက်မှ အခန်းတံခါးကို ကြားလောက်အောင် ပိတ်သွားတတ်သည်။ သို့ရာတွင် နီဘာရန်းစိတ်၌ မျက်လုံးတစ်စုံသည် နံရံကြားတစ်နေရာမှ ချောင်းကြည့်နေလိမ့်မည်ဟု ထင်သည်။ ထို့ကြောင့် နီဘာရန်းသည် အားတင်းကာ ဥပေက္ခာပြုလုက်ပြီး တစ်ဖက်သို့လှည့်၍ အိပ်ငိုက်နေတတ်သည်။ ရှေလဘာလာကလည်း သူ့မျက်နှာဖုံးကို ပြန်ဖုံးကာ ခပ်ကုပ်ကုပ်ဖြင့် ချောင်ကလေးတစ်ချောင်ထဲသို့ ပျောက်ကွယ်သွားတတ်သည်။
နောက်ဆုံးတွင် ဟာရာရှန္ဒရီသည် ခရီးမရောက်သည့်အတွက် သူ့အကြံကို လက်လျှော့လိုက်သည်။ ထိုအခါတွင်မူ နီဘာရန်းအဖို့ သူကိုယ်တိုင် အားထုတ်ရန် အခွင့်အလမ်း ရသွားလေပြီ။ စူးစမ်းလိုစိတ်၊ လျှို့ဝှက်ကြံစည်လိုစိတ်သည် သူ့ကို စေ့ဆော်တိုက်တွန်းလျက်ရှိလေပြီ။ နီဘာရန်းသည် လက်ထဲတွင် စိန်ကောင်းကျောက်ကောင်းတစ်လုံးကို ကိုင်ကာ လုံးစေ့ပတ်စေ့ကြည့်သကဲ့သို့ ရှေလဘာလာကို စေ့စေ့စပ်စပ် အကဲခတ်သည်။ ထိုရတနာကို သူ ကိုယ်တိုင် စမ်းသပ်ကြည့်လိုသည်။ ယုယပိုက်ထွေးလိုသည်။ လူသူမသိအောင် ကြည့်လိုသည်။ ရှေလဘာလာ၏ နားဆွဲကလေးများ လှုပ်ယမ်းနေပုံ၊ မျက်နှာဖုံးပုဝါလေး နောက်သို့ လျှောကျသွားသပုံ မျက်နှာဖုံးပုဝါကလေးအောက်မှ သူ့မျက်နှာကလေးကို လှစ်ခနဲ မြင်လိုက်ရပုံ၊ ကြယ်ပွင့်တို့ကို ငေးကြည့်သကဲ့သို့ သူ့မျက်နှာကလေးကို စိုက်ကြည့်လိုက်ရပုံ စသည်တို့သည် သူ့အိပ်မက်နယ်မြေထဲသို့ ဆွဲခေါ်သွားသကဲ့သို့ ရှိသည်။
မက်မိုရန်ကုမ္ပဏီမှ စာရေးကြီး မစ္စတာနီဘာရန်းချန္ဒရာသည် သူ့တစ်သက်တွင် တစ်ခါမျှ မခံစားရဖူးသော အဖြစ်မျိုးကို ကြုံနေရလေပြီ။ သူလက်ထပ်ခဲ့တုန်းက သူသည် သူငယ်ကလေးသာသာမျှသာ ရှိသေးသည်။ သူ လူရွယ်ဘ၀သို့ရောက်လာသည့်အခါတွင်ကား သူ့ဇနီးသည်ကိုငြီးငွေ့စပြုနေလေပြီ။ သူ့အဖို့ လက်ထပ်ထိမ်းမြားသည့်ကိစ္စသည် ထုံးတမ်းစဉ်လာတစ်ခုသာဖြစ်ခဲ့သည်။ သူသည် ဇနီးသည် ဟာရာရှန္ဒရီကို ချစ်ပါ၏။ သို့ရာတွင် ထိုအချစ်မျိုးသည် သူ့စိတ်ထဲတွင် ဘာမျှ အမှတ်ထင်ထင်မရှိခဲ့။
သရက်သီးထဲတွင် မွေးလာသည့် သရက်ပိုးသည် ဘယ်အခါမျှ အဆီအနှစ် ကုန်ခမ်းမည်ကို မစိုးရိမ်ရ။ သို့ရာတွင် သရက်ပိုးသည် သရက်သီးအဆီအနှစ်၏ အရသာမှလွဲ၍ အခြားသော သစ်သီးတို့၏ အဆီအနှစ်အရသာကို မသိနိုင်။ သရက်ပိုးကို သရက်သီးထဲမှ အပြင်ဘက်သို့ လွှတ်လိုက်လျှင် ထိုသရက်ပိုးသည် နွေဦးပန်းပွင့်တို့၏ အရသာကို ရှာကြည့်လိမ့်မည်။ ပွင့်ခါစ နှင်းဆီပွင့်များကြားတွင် တစ်ပွင့်မှတစ်ပွင့်သို့ လူးလားပျံဝဲကာ ၀တ်ရည်ကို မြည်းစမ်းသောက်သုံး လိုက်ရသည်ဆိုလျှင်ပင် ထိုပိုးသည် မြူးထူးကခုန်နေပေလိမ့်မည်။
နီဘာရန်းသည် ဂါဝန်ဝတ်ထားသည့် ယမင်းရုပ်ကလေးတစ်ရုပ်၊ ရေမွှေးတစ်ပုလင်းနှင့် သကြားလုံးကလေးများကို ရှေလဘာလာအတွက် တိတ်တိတ်ဝယ်ပေးသည်။ ထိုသို့ ၀ယ်ပေးခြင်းကြောင့် သူတို့နှစ်ယောက်သည် ပို၍ ရင်းနှီးလာကြသည်။ တစ်နေ့တွင် ဟာရာရှန္ဒရီသည် အိမ်မှုကိစ္စတွေ အားချိန်တွင် တံခါးမှ ချောင်းကြည့်လိုက်ရာ နီဘာရန်းနှင့် ရေလဘာလာတို့ နှစ်ယောက် ခရုခွံကလေးတွေဖြင့် ကလေးတွေ ကစားသလို ကစားနေသည်ကို မြင်ရ၏။
လူကြီးတန်မဲ့ ကလေးကစားသလို ကစားနေသည်ကို မြင်ရသည်မှာ တော်တော် ထူးဆန်းနေသည်။ ထိုနေ့ နံနက်စာစားပြီးသည့်အခါ၌ နီဘာရန်းသည် ရုံးသွားချင်ယောင်ဆောင်ပြီးနောက် ရှေလဘာလာ၏ အခန်းထဲသို့ ၀င်သွားသည်။
အဘယ်ကြောင့် လိမ်လည်လှည့်ဖြား နေရသနည်း ...
ဟာရာရှန္ဒရီသည် မျက်လုံးကို သံပူဖြင့် အထိုးခံရသကဲ့သို့ ဖြစ်ကာ ပူလောင်သည့် မျက်ရည်ပေါက်များသည် စီးကျလာကြသည်။ မိမိသည် ကောင်မလေးကို အိမ်သို့ခေါ်လာခဲ့ပြီး သူတို့နှစ်ယောက်ကို နေရာချ ပေးထားပါလျက် အဘယ်ကြောင့် ဤသို့ခိုးကြောင်ခိုးဝှက် တွေ့နေကြရသနည်း .........
မိမိသည် သူတို့ကြားထဲတွင် ဆူးငြောင့်ခလုတ်ဖြစ်နေပြီလောဟု ဟာရာရှန္ဒရီ တွေးမိသည်။
သူသည် မကြာသေးမီက ရှေလဘာလာကို အိမ်မှုကိစ္စတွေကို လုပ်တတ်အောင် သင်ပေးခဲ့သည်။ တစ်ခါတွင်မူ နီဘာရန်းသည် မဖုံးနိုင် မဖိနိုင် ပေါက်ကွဲတော့သည်။
“ကောင်မလေးက ကလေးပဲ ရှိသေးတာပဲကွ။ ဒီလောက်ခိုင်းရင် သေရောပေါ့”
ဟာရာရှန္ဒရီက တစ်စုံတစ်ရာပြန်ပြောမည် လုပ်သေးသည်။ သို့ရာတွင် ချုပ်တည်းကာ အသာပင်နေလိုက်သည်။
ထို့နောက်တွင်မူ ဒုတိယမယားသည် ဘာမျှမလုပ်ရတော့။ ဟာရာရှန္ဒရီသည် အိမ်မှုကိစ္စတွေ၊ အချက်အပြုတ်လုပ်ငန်းတွေကို သူ ကိုယ်တိုင်သာ လုပ်တော့သည်။
ရှေလဘာလာမှာ ဘာကိုမျှမလုပ်ရတော့။ ဟာရာရှန္ဒရီသာလျှင် ကျေးကျွန်တစ်ယောက်သဖွယ် သူ့ကို ပြုစုစောင့်ရှောက်ရသည်။ နီဘာရန်းမှာလည်း အထိန်းတော်တစ်ယောက်ပမာ သူ့ကို အပျင်းဖြေရသည်။ အိမ်တွင်းမှုလုပ်ငန်းများကို လုပ်ခြင်း၊ အခြားသူများအား ပြုစုစောင့်ရှောက်ခြင်း စသည့်ဘ၀တွင် အရေးကြီးသော အလုပ်ဟူသမျှတို့ကို ရှေလဘာလာ ဘာမျှမပတ်သက်တော့။ ဟာရာရှန္ဒရီသာလျှင် အိမ်မှုကိစ္စတို့ကို သိမ်းကျုံး၍ လုပ်နေရသည်။ သို့ရာတွင် ဟာရာရှန္ဒရီသည် ထိုသို့လုပ်ရသည့်အတွက် ၀မ်းမနည်း၊ အားမငယ် ဂုဏ်ပင်ယူလိုက်သေးသည်။ သူ့ယောက်ျားနှင့် ရှေလဘာလာတို့ကိုလည်း “သွား ..... သွား၊ ကစားချေကြ။ တစ်အိမ်လုံး အလုပ်ကို ဒီက ဒိုင်ခံလုပ်မယ်”ဟု ပြောတတ်သည်။
ဟာရာရှန္ဒရီသည် ယခင်တုန်းက သူ့ယောက်ျား၏အချစ်ကို ဝေမျှပေးမည်ဟု သဘောထားကြီးကြီးထားနိုင်ခဲ့ပါ၏။ သို့ရာတွင် ယခုမူ ထိုသဘောထားကြီးမှုတို့သည် ဘယ်ဆီသို့ ရောက်ကုန်ကြပြီနည်း ......
လပြည့်တွင် ကမ်းပြည့်လျှံတတ်သော ဒီရေလို ထိုသို့သော သဘောထားမှုမျိုးတွင် ရင်နှင့်အမျှ ရှိခဲ့စဉ်ကမူ သူ့ကိုယ်သူ အရာရာကို လုပ်နိုင်သည်။ ဘာမဆိုဖြစ်နိုင်သည်ဟု သူထင်ခဲ့သည်။ ထိုစဉ်တုန်းကတော့ ဒီရေအရှိန်က ပြင်းနေသဖြင့် ဆုံးဖြတ်ချက်ကြီးတွေကို ချနိုင်ခဲ့သည်။ ကိုယ့်မှာ စည်းစိမ်ဥစ္စာပေါများတုန်းက ပစ္စည်းဥစ္စာတို့ကို လွယ်လွယ်ဖြင့် ပေးမည်ဟု ကတိပေးခဲ့သော်လည်း ကိုယ်တွင် ဆင်းရဲဒုက္ခရောက်ပြီဆိုသည့်အခါ၌ကား ကတိမတည်နိုင်တော့ဘဲ မူးစပဲစဖြင့် တတိတတိ ဆပ်နေရကာ မသ္ဓရေစာဖြစ်လာခဲ့သည်။ ထိုအခါမျိုးကျမှပင် လူ့စိတ်ဆိုသည်မှာ မည်မျှတွန့်တိုတတ်ကြောင်း၊ လူ့နှလုံးသားသည် မည်မျှမနာလိုတိုရှည်ဖြစ်တတ်ကြောင်း၊ လူသည် မည်မျှသဘောထား ကျဉ်းမြောင်းတတ်ကြောင်း သိလာကြရသည် မဟုတ်လော။
ဟာရာရှန္ဒရီသည် နာလန်ထလာသည့်တိုင် ရင်းစားပြန်ရသည်ဟူ၍ မရှိသေး။ အားနည်းမောပန်းနေပြီး သူ့အသားမှာလည်း ဆန်းစစ်လကလေးအရောင်ကဲ့သို့ ၀ါဖျော့ဖြူလျော်လျက်ရှိသည်။ ထိုစဉ်တုန်းကတော့ သူ့အဖို့ ဘာမျှလိုချင်တောင့်တမရှိခဲ့။ သို့ရာတွင် တဖြည်းဖြည်းဖြင့် ကျန်းမာလာကာ ခွန်အားပြည့်ဖြိုးလာသည့်အခါတွင်မူ သူ့စိတ်ထဲမှ အတွေများသည် အော်ဟစ်ဆန္ဒပြလာခဲ့ကြသည်။
“ခင်ဗျားကတော့ တစ်ချက်လွှတ် အမိန့်ထုတ်လိုက်တာပဲ။ ဒါပေမယ့် ကျုပ်တို့က ကျုပ်တို့ပိုင်ခွင့်တွေကို အဆုံးရှုံးမခံနိုင်ဘူးဗျ”ဟု ထိုအတွေးများက ပြောနေသကဲ့သို့ ရှိသည်။
ဟာရာရှန္ဒရီသည် သူ့အခက်အခဲကို သဘောပေါက်လာသည့်အခါ၌ သူ့အခန်းကို နီဘာရန်းနှင့် ရှေလဘာလာတို့ကို ပေးပြီးနောက် တခြားအခန်းတစ်ခန်းသို့ သွားပြီးတစ်ယောက်တည်း အိပ်သည်။ သူသည် ရှစ်နှစ်သမီးကတည်းက ထိုအခန်းကလေးထဲတွင် အိပ်ခဲ့သည်။ လက်ထပ်သည့်ညတုန်းကလည်း ထိုအခန်းလေးထဲမှာပင် အိပ်ခဲ့သည်။ နောက် နှစ်ပေါင်းနှစ်ဆယ့်ခုနစ်နှစ်တိုင်တိုင်ပင် ထိုအခန်းကလေးထဲမှာပင် အိပ်ခဲ့သည်။ ယခုမူ သူအိပ်ခဲ့သည့်အခန်းကလေးကို စွန့်လွှတ်ခဲ့လေပြီ။
ဟာရာရှန္ဒရီသည် မီးအိမ်ကို ငြိမ်းလိုက်ပြီးနောက် အိပ်ရာပေါ်သို့ လှဲလိုက်သည်။ ထိုစဉ် လမ်းမဆီမှ သီချင်းသံတစ်သံကို ကြားလိုက်ရသည်။ သီချင်းဆိုသံမှာ တော်တော်ကောင်းပြီး တာပလာဗုံကလေးကလည်း နောက်မှ အချက်ကျကျလိုက်တီးလျက်ရှိ၏။ သီချင်းဆုံးသွားတိုင်း သူငယ်ချင်းများက သြဘာပေးနေကြသံများကိုလည်း ကြားနေရသည်။
ထိုသီချင်းသံသည် ဟာရာရှန္ဒရီ၏ ဟာလာဟင်းလင်းဖြစ်နေသော ရင်ထဲက အပူကို နှိုးဆွပေးနေသကဲ့သို့ ရှိသည့်တိုင် သူ့အခန်းနှင့် ကပ်လျက်တွင် ရှိနေသူတို့ကိုမူ ချော့မြူသိပ်ပေးနေသကဲ့သို့ ရှိ၏။ ထိုအခန်းထဲတွင်မူ ရှေလဘာလာ မျက်လုံးများသည် အိပ်ချင်စိတ်ဖြင့် မှေးစင်းလျက်ရှိကာ နီဘာရန်း၏ နှုတ်ခမ်းများမှာမူ သူ့နားသို့ ကပ်လျက်ကာ တွတ်တီးတွတ်တာ ပြောဆိုလျက်ရှိ၏။
ထိုအချိန်၌ နီဘာရန်းသည် ဘန်ကင်ကျန္ဒရ၏ “ကျန္ဒရရှိကာ” ၀တ္ထုကိုဖတ်ပြီးနောက် ရှေလဘာလာအား ခေတ်ပေါ်ကဗျာများကို ဖတ်ပြနေသည်။ မေ့လျော့ပစ်ထားခဲ့သည့် နုပျိုမှုရေပန်းရေမြွှာတို့သည် စိမ့်ယိုစီးထွက်လာကာ သူ မမျှော်လင့်သည့်အချိန်တွင် အရှိန်ဟုန်ပြင်းစွာဖြင့် ပန်းထွက်လာကြသည်။ ထိုသို့သောအဖြစ်မျိုးကို မည်သူမျှ မျှော်လင့်ထားခြင်းမရှိကြ။ ထိုအဖြစ်ကြောင့် နီဘာရန်း၏ စိတ်ထားသည် တစ်မျိုးတစ်ဖုံ ပြောင်းလဲသွားကာ အိမ်တွင်းရေးသည်လည်း ကပြောင်းကပြန် ဖြစ်သွားခဲ့သည်။ လူ့စိတ်သည် ထိုမျှပြောင်းလဲတတ်သော သဘော၊ ထိုမျှ သောင်းကျန်းတတ်သော သဘောရှိသည်ကို နီဘာရန်းတစ်ခါမျှ မစဉ်းစားမိခဲ့။ ထိုစိတ်မျိုးကာ ဆင်ရိုင်းကဲ့သို့ သောင်းကျန်းလေစွ။ စနစ်တကျရှိ၍ သာယာသော ဘ၀တစ်ခုကို ဖရိုဖရဲဖြစ်အောင် ဖျက်ဆီးတတ်လေစွ။
နီဘာရန်းသာလျှင် စိတ်ဆင်းရဲရသည် မဟုတ်။ ဟာရာရှန္ဒရီမှာလည်း စိတ်ဒုက္ခရောက်ရသည်။ မိမိသည် အဘယ့်ကြောင့် နေမထိထိုင်မသာ ဖြစ်နေရသနည်း။
အဘယ့်ကြောင့် ထိုမျှဆင်းရဲဒုက္ခရောက်နေရသနည်း ...
ယခု သူတောင့်တနေသောအရာကို ယခင်က သူတစ်ခါမျှ ဂရုထားမိခြင်း မရှိ။ တစ်ခါမျှ အရေးထားခဲ့မိခြင်း မရှိ။ အလျင်တုန်းက နီဘာရန်း ရုံးသွားစဉ် သူနှင့်အတူ အိပ်ရာဝင်ချိန်တုန်းဆိုလျှင် သူတို့နှစ်ယောက်သည် နွားနို့ဖိုး၊ အိမ်စရိတ်၊ ကုန်ဈေးနှုန်း၊ သာရေးနာရေး ကိစ္စစသည်တို့ကို ဆွေးနွေးကြသည်။
ထိုစဉ်တုန်းကမှ ယခုလို ရင်ထဲမှာ ဗလောင်ဆူသည့် အဖြစ်မျိုးကို မကြုံစဖူး။ သူတို့ လင်မယားသည် တစ်ဦးကို တစ်ဦး ချစ်ခဲ့ကြသည့်တိုင် ထိုစဉ်က ရမ္ကက်မီးလျှံဟူ၍ မရှိခဲ့။ ထိုစဉ်က သူတို့အချစ်သည် မီးမညှိရသေးသည့် မီးစာပုံ အစုအထွေးကဲ့သို့ ဖြစ်ခဲ့သည်။
ယခုမူ တစ်စုံတစ်ယောက်သည် ၀င်ရောက်လာကာ သူ့ထံမှ အထွတ်အမြတ်ထားသည့်အရာကို လုယူသွားသည်ဟု ဟာရာရှန္ဒရီ ထင်သည်။ သူ့မိန်းမဘ၀သည် ထာဝရခန်းခြောက်သွားကာ ညှိုးရော်ကြွေကျသွားခဲ့ပြီဟု ထင်နေသည်။ သူသည် ချက်ရေးပြုတ်ရေးကိစ္စ၊ စာရေးသောက်ရေးကိစ္စ၊ ကွမ်းဆေးကိစ္စတို့ဖြင့် နှစ်ဆယ့်ခုနစ်နှစ်လုံးလုံး အစေခံမကြီးသဖွယ် အချိန်ကုန်ခဲ့ရပြီးနောက် ဘ၀တွင် အမြင့်ဆုံးရောက်နေသည့် အချိန်၌ကာ အပျိုပေါက်စ ကောင်မလေးတစ်ယောက်သည် တစ်ဖက်ခန်းတွင် ရောက်နေကာ ရတနာသိုက်ကို သော့ရိုက်ဖွင့်၍ အိမ်ကြီးရှင်မအဖြစ်ကို ယူနေလေပြီ။
မိန်းမဆိုသည်မှာ အိမ်ဦးနတ်ကို အလုပ်အကျွေးပြုရမည်ဆိုသည်မှာ မှန်ပါ၏၊ သို့ရာတွင် ထိုမျှမကသေးပါ။ အိမ်ကို အုပ်စိုးရန်လည်း ဖြစ်ပါသည်။ သို့ရာတွင် ယခုမိန်းမတစ်ယောက်က အစေခံဖြစ်နေပြီး အခြားမိန်းမတစ်ယောက်က မဟေသီဖြစ်နေလေပြီ။ အစေခံသည် ဂုဏ်သိက္ခာကို ဆုံးရှုံးထားခဲ့ကာ မဟေသီမှာမူ စည်းစိမ်ချမ်းသာကို ရနေလေပြီ။
အမှန်မှာ ရှေလဘာလာကိုယ်တိုင်လည်း ပျော်ပိုက်ခြင်း မရှိပါ။ သူ့ကို နီဘာရန်းက အလေးပေးဂရုစိုက်လွန်းသဖြင့် ရှေလဘာလာတွင် အချစ်အတွက် အချိန်မရှိတော့ပါ။ မြစ်သည် မြစ်ကြောင်းအတိုင်း စီးဆင်းသွားကာ ပင်လယ်နှင့်ပေါင်းဆုံသည့်အခါတွင် မြစ်ဖြစ်ရခြင်း ရည်ရွယ်ချက်သည်လည်း ပြီမြောက်ပါသည်။ သို့ရာတွင် ပင်လယ်သည် ဒီရေကြော့် အမြဲတစေ မြစ်ထဲသို့ ၀င်လာသည့်အခါတွင်မူ မြစ်သည်လည်း ဖောက်လှဲဖောက်ပြန်ဖြစ်ကာ ရေလျှံတတ်ပါသည်။
နီဘာရန်း၏ အိမ်မှာလည်း ထိုအတိုင်းပင် ဖြစ်နေပါသည်။ နီဘာရန်းမှအစ တစ်အိမ်လုံးက သူ့ကို ဖူးဖူးဖှုတ်ထားကြသည့်အတွက် ဘ၀င်မြင့်ခဲ့ပါသည်။ လောကကြီးတစ်ခုလုံးသည် သူ့စိတ်တိုင်းကျဖို့ ပေါ်ပေါက်လာရခြင်း ဖြစ်ပြီး သူကမူ မည်သူစိတ်တိုင်းကျဖြစ်အောင် လုပ်ဖို့မလိုဟု ထင်ခဲ့ပါသည်။ ထိုသို့အထင်သည် ဘ၀င်ကို ပင့်ပေးပါသည်။ ဤတွင် တွေ့သမျှ မြင်သမျှကို ဘ၀င်မကျ ဖြစ်လာတတ်သည်။
တစ်နေ့တ၊ွင်မူ ကောင်းကင်သည် မိုးတိမ်တို့ဖြင့် မည်းမှောင်လျက်ရှိ၏။ အိမ်ထဲတွင်လည်း မှောင်လျက်ရှိသဖြင့် အလုပ်ကိုပင် ကောင်းကောင်းလုပ်၍မရ။ မိုးသည် သဲသဲမဲမဲ ရွာချနေ၏။ သပြေပင်ကြီး အောက်မှ ပေါင်းပင်မြက်ပင်များမှာ ရေအောက်တွင် ရောက်နေသည်။ ပြိုကျနေသော အုတ်နံရံအနီးတ၀ိုက်တွင် ညစ်ပတ်နောက်ကျိနေသော ရေများသည် တဝေါဝေါစီးဆင်းနေကြသည်။ ဟာရာရှဒ္ဒရီသည် သူ့အိပ်ခန်းသစ်ပြတင်းပေါက်အနီးတွင် ထိုင်နေသည်။
နီဘာရန်းသည် အခန်းဝသို့ တိတ်တဆိတ်ရောက်လာကာ အခန်းထဲဝင်ရမည်လားဟု စဉ်းစားနေသည်။ ဟာရာရှန္ဒရီသည် အခန်းဝတွင် နီဘာရန်းရောက်နေသည်ကို သတိပြုမိသည်။ သို့ရာတွင် စကားတစ်လုံးမျှ မပြော။ နီဘာရန်းသည် အခန်းထဲသို့ ရုတ်တရက် ၀င်ရောက်လာကာ အမောတကော ပြောသည်။
“မင်းလက်ဝတ်လက်စားတွေ ပေးစမ်းကွာ။ ငါ့မှာ အကြွေးသိပ်များနေတယ်။ ကြွေးရှင်တွေကလည်း တကျည်ကျည် လုပ်နေကြတယ်။ ငါ ပေါင်ပြီး ဆပ်လိုက်ချင်တယ်။ ငါ ပြန်ရွေးပေးပါ့မယ်၊ မကြာပါဘူး”
ဟာရာရှန္ဒရီက မည်သို့မျှမဖြေ။ နီဘာရန်းသည် ရာဇ၀တ်သားတစ်ဦးလို ရပ်နေသည်။ အတန်ကြာသည့်အခါမှ သူက ခပ်တိုးတိုးမေးသည်။
“ဘယ့်နှယ့်လဲ ... မပေးနိုင်ဘူးလား”
“ဟင့်အင်း ......... မပေးနိုင်ဘူး”
အခန်းထဲသို့ ၀င်လာရသည်မှာ လွယ်သလောက် ပြန်ထွက်သွားရသည်မှာ ခက်နေသည်။ နီဘာရန်းသည် တောင်ကြည့် မြောက်ကြည့်လုပ်နေပြီး “ဒီလိုဆိုရင်လည်း တခြားက ရှာရမှာပေါ့”ဟု ဆိုကာ ခပ်သုတ်သုတ် ပြန်ထွက်သွားသည်။
နီဘာရန်းတွင် ကြွေးရှိနေကြောင်း တစ်နေ့နေ့တွင် သူ့လက်ဝတ်လက်စားများကို ပေါင်မည်ဖြစ်ကြောင်းကို ဟာရာရှန္ဒရီ သိပြီးသား ဖြစ်သည်။ မနေ့ညတုန်းကပင် အပိုးကျိုးနေသော သူ့ယောက်ျားကို ရှေလဘာလာ ပူဆာခဲ့သေးသည်။
“အစ်မကြီးတို့မှာတော့ စိန်တွေရွှေတွေကို ညွတ်နေတာပဲ။ ကျွန်မမှာတော့ ဘာမှမရှိဘူး” ဟု ပြောသံကို ကြားရသည်။
ဟာရာရှန္ဒရီသည် ဖြည်းညင်းစွာထကာ မီးခံသေတ္တာကို ဖွင့်သည်။ အထဲမှ လက်ဝတ်ရတနာများအားလုံးကို တစ်ခုပြီးတစ်ခု ထုတ်သည်။ ရှေလဘာလာကို ခေါ်ပြီးနောက် သူလက်ထပ်တုန်းက ၀တ်သည့် ဗာရာဏသီဆာရီကို ခြုံပေးသည်။ ထုတ်ထားသည့် လက်ဝတ်ရတနာများ အားလုံးကိုလည်း သူကိုယ်တိုင် ဆင်ပေးသည်။ ထို့နောက် မီးအိမ်ကို ထွန်းပြီး မိန်းကလေး၏ မျက်နှာကို ကြည့်သည်။ မျက်နှာကလေးက ချိုမြရွှန်းလဲ့နေသည်။ မှည့်၍ မွှေးနေသော သစ်သီးတစ်လုံးလို ရွှန်းဆို အပြစ်ကင်းနေသည်။ ရှေလဘာလာ ပြန်ထွက်သွားသည့်အခါ၌ တချွင်ချွင်မြည်နေသော လက်ဝတ်ရတနာတို့၏ အသံများသည် ဟာရာရှန္ဒရီ၏ သွေးထဲတွင် အတန်ကြာမျှ မြည်ဟည်းပဲ့ထပ်နေကြသည်။ ယနေ့တွင်မူ မိမိနှင့် ရှေလဘာလာတို့သည်အကွာကြီး ကွာခြားသွားခဲ့ကြပြီး သို့ရာတွင် သူငယ်ငယ်တုန်းကမူ သူလည်း ထို့အတူ နုပျိုမှုဖြင့် ရွှန်းသစ်နေခဲ့သည်။ ထိုစဉ်တုန်းက သူ့ကို မည်သူကမျှ သူ့အကြောင်းကို ရှင်းလင်းမပြခဲ့ကြ။
သူ့ အလှကျက်သရေဖြိုးဝေချိန်သည် ကုန်လွန်သွားခဲ့ပြီ။ ထိုစဉ်တုန်းကမူ သူ သတိမထားမိခဲ့။ ယခုနုပျိုမှုဖြင့် ဂုဏ်မောက်နေသော ရှေလဘာလာကိုမြင်မှ သူ သတိပြုမိတော့သည်။ ရှေလဘာလာသည် လှိုင်းလုံးကလေးတစ်လုံးကို လှုပ်ရှားနေသည်။
ဟာရာရှန္ဒရီသည် အိမ်မှုကိစ္စလောက်ကိုသာ အလေးထားနေသဖြင့် သူအဖို့ ထိုလက်ဝတ်ရတနာများသည် ဘာအဓိပ္ပယ်မျှ မရှိ၊ လက်ဝတ်ရတနာများကို တစ်ခဏအတွင်း စွန့်လွှတ်ပစ်လိုက်ခြင်းမှာ မိုက်မဲရာတော့ ရောက်ကောင်းရောက်မည်။ သို့ရာတွင် ဟာရာရှန္ဒရီသည် အိမ်မှုကိစ္စထက် အရေးကြီးသည့်ကိစ္စတစ်ခုကို သိခဲ့သည့်အတွက် ထိုသို့သော လက်ဝတ်ရတနာများ၊ အိမ်မှုကိစ္စများသည် သူ့အဖို့ အသေးအဖွဲများ ဖြစ်သွားခဲ့လေပြီ။
ပြိုးပြက်တောက်သော လက်ဝတ်ရတနာတို့ကို ဆင်မြန်း၍ အိပ်ခန်းဆီသို့ ပြန်လာသော ရှေလဘာလာမှာမူ ထိုရတနာများသည် မည်မျှ တန်ဖိုးရှိသည် မရှိသည်ကို တစ်ချက်ကလေးမှ မစဉ်းစားမိ။ သူသိသည်မှာ အချိန်တန်သည်နှင့် ထိုရွှေ၊ ထိုဂုဏ်သိက္ခာ၊ ထိုစည်းစိမ်ဥစ္စာ ဟူသမျှတို့သည် သူ့လက်ထဲသို့ မုချဆတ်ဆတ်ရောက်လာမည် ဆိုသည့်အချက်သာ ဖြစ်သည်။ အကြောင်းမူ သူသည် ရှေလဘာလာဖြစ်သောကြောင့်ဖြစ်သည်။ တစ်အိမ်လုံး၏ အချစ်တော်ဖြစ်သောကြောင့် ဖြစ်သည်။
အိပ်မက်ထဲတွင် သူသူကိုယ်ကိုယ် အကြောက်အရွံ့မရှိ လမ်းလျှောက်နိုင်ကြသည်။ မည်မျှကြောက်စရာကောင်းသော လမ်းမျိုးကို ဖြစ်စေ ဆုတ်ဆိုင်းခြင်းမရှိ။ အိပ်ပျော်ခြင်းမရှိသည့် အချိန်များတွင်လည်း ထိုသို့အကြောက်အရွံ့မရှိ။ အဆင်အခြင်မရှိ လမ်းလျှောက်သူတွေ ရှိတတ်သည်။ သူတို့မှာ ဘေးဒုက္ခကို လှလှကြီး ကြုံတွေ့သည့်အခါမှပင် အိပ်ရာမှ နိုးလာကြသည်။
မက်မိုရန်ကုမ္ပဏီမှ စာရေးကြီး နီဘာရန်းသည်လည်း ထို့အတူပင်။ ရှေလဘာလာဆိုသည့် မိန်းကလေးသည် သူ့ဘ၀ကို ၀င်ရောက်မွှေနှောက်သွားသည့် လေဆင်နှာမောင်းနှင့်တူသည်။ သူသည် သူနှင့် ဘာမျှမသက်ဆိုင်သော အဖိုးတန်ပစ္စည်းများကို စုပ်ယူ သယ်ဆောင်သွားသည်။ ထိုပစ္စည်းများထဲတွင် နီဘာရန်း၏ ဆင်ခြင်တုံတရား၊ နီဘာရန်း၏ ဂုဏ်သိက္ခာ၊ နီဘာရန်း၏လခ၊ ဟာရာရှန္ဒရီ၏ ပျော်ရွှင်မှုနှင့် လက်ဝတ်ရတနာများလည်း ပါသည်။ နီဘာရန်းသည် မက်မိုရန်ကုမ္ပဏီမှ ငွေများကို တိတ်တဆိတ် ထုတ်သုံးသည်။ တစ်ခါတစ်ရံ ငွေစက္ကူတွေကို တစ်ဝက်ချင်းယူသည်။ တစ်ခါတစ်ရံတွင်လည်း အထုပ်လိုက်ယူသည်။ နောက်လခထုတ်သည့်အခါတွင် ပြန်ထည့်မည်ဟု စိတ်ကူး၍ ယူခြင်းဖြစ်သည်။ သို့ရာတွင် နောက်လခမှာလည်း လေဆင်နှာမောင်း၏ ဗဟိုချက်ထဲတွင် စုံးစုံးမြုပ်သွားသည်။ ခဏမျှ ပြိုးပြက်နေသော မူးစေ့တစ်စေ့ပင် မချန်။ လေဆင်နှာမောင်းထဲတွင် ပျောက်ကွယ်သွားတော့သည်။
နောက်ဆုံးတွင် နီဘာရန်း၏ကိစ္စသည် ဘူးပေါ်သလို ပေါ်သွားသည်။ သူ့ရာထူးမှာ မိဘအစဥင်္်အဆက်ကြောင့် ရသော ရာထူးဖြစ်သည်။ အထက်လူကြီးက သူ့ကို သနားသဖြင့် ငွေရှာပြီး ပြန်သွင်းရန် နှစ်ရက် အချိန်ပေးသည်။ သူ ယူသုံးသည့် ငွေမှာ နှစ်ထောင့်ငါးရာရှိသည်ကို တွေ့ရသည့်အခါတွင် အံ့သြနေသည်။ သည်မျှလောက်များသည့် ငွေကို ဘယ်လိုလုပ် ကုန်သွားသည်ကို စဉ်းစားမရအောင် ဖြစ်နေသည်။ “ငါတော့ ခွေးဖြစ်ပြီ”ဟု ဟာရာရှန္ဒရီ၏ ရှေ့တွင် အရူးသဖွယ် ညည်းမိသည်။
ဟာရာရှန္ဒရီမှာလည်း အဖြစ်အပျက်တစ်ခုလုံးကို နားထောင်ပြီးနောက် မျက်နှာဖြူဖပ်ဖြူလျော် ဖြစ်နေသည်။
“မင်း လက်ဝတ်လက်စားတွေပေးပါဦး”ဟု တောင်းသည်။
“ဘယ်မှာ ရှိတော့လို့လဲ။ ကောင်မလေးကို အကုန်ပေးလိုက်ပြီ“
နီဘာရန်းသည် ကလေးတစ်ယောက်လို ဖြစ်နေသည်။
“ခက်တာပဲကွာ။ ဘာဖြစ်လို့ အကုန်ပေးလိုက်ရတာလဲ။ မင်းကို ဘယ်သူက အပေးခိုင်းလို့လဲ”
“ပေးလိုက်တော့ ဘာဖြစ်သလဲရှင် ရေထဲ ပစ်ချတာမှ မဟုတ်တာ”
သတ္တိကြောင်သော နီဘာရန်းသည် ဆုတ်ဆိုင်းဆိုင်းဖြင့်
“သွားကွာ အကြောင်းတစ်ခုခုပြပြီး ပြန်တောင်းချေ။ ငါက အတောင်းခိုင်း လိုက်တာလို့တော့ မပြောနဲ့နော်။ အကြောင်းကိုလည်း မပြောနဲ့”
ဟာရာရှန္ဒရီသည် သူ့ယောက်ျား၏ ဖြစ်ပုံကိုမြင်သည့်အခါတွင် စက်လည်း စက်ဆုပ်သည်။ ဒေါသလည်း ထွက်သည်။
“ဘာ ဟန်ဆောင်ပြီး အကြောင်း ပြရမှာလည်း ရှင့်။ အမှန်အတိုင်း ဖွင့်ပြောရမှာပေါ့။ ဒီလောက်ကိစ္စများနေတဲ့အထဲမှာ ဟန်ဆောင်ပန်ဆောင်တွေ ဘာလုပ်နေစရာရှိသလဲ။ လာလိုက်ခဲ့”
ဟာရာရှန္ဒရီသည် သူ့ကို ဒုတိယမယား၏ အခန်းထဲသို့ ခေါ်သွားသည်။
ရှေလဘာလာသည် အကျိုးအကြောင်းပြောပြသည်ကို လက်မခံ၊ ဘာတွေပြောပြော ဘယ်လိုနားချချ “ဒါဟာ ကျွန်မ ဘယ်သိမလဲ”ဟူသော စကားဖြင့်သာ တုံ့ပြန်သည်။
သူ့နောက်ကို လိုက်လာခဲ့စဉ်က အိမ်တွင်းရေးကိစ္စများတွင် အခြားသူများနှင့်အတူ အေးအတူပူအမျှ ခံမည်ဟု သူမပြောဖူးခဲ့။ လူတိုင်း ကိုယ့်ကိစ္စကို ကိုယ်ဘာသာ ကိုယ်ဖြေရှင်းရမည် မဟုတ်လော။ မိမိသည် ဤအိမ်တွင် ခြေမွေးမီးမလောင် လက်မွေးမီးမလောင် နေရန် ရောက်လာခြင်း မဟုတ်လော။ ယခုမှ အိမ်သားတွေနဲ့အတူ အေးအတူ ပူအမျှ ခွဲဝေခံစးရမည်ဟု ဆိုလာခြင်းမှာ နည်းနည်းမျှ မတရားဟု သူထင်သည်။
နီဘာရန်းသည် ရှေလဘာလာ၏ ခြေရင်းတွင်ထိုင်၍ ငိုနေသည်။ ရှေလဘာလာကမူ “ဒါတွေ ကျွန်မ မသိဘူးလေ။ ကျွန်မနဲ့ ဘာဆိုင်တာ မှတ်လို့၊ ဒီပစ္စည်းတွေကို ဘယ်နှယ့်လုပ်ပေးလို့ ဖြစ်မလဲ”ဟုသာ တွင်တွင် ပြောနေသည်။
နူးညံ့ပျော့ပြောင်း၍ ကြင်နာသနားတတ်ဟန်ရှိသော ရှေလဘာလာသည် မီးခံသေတ္တာကြီးထက် ခိုင်ခန့်ကြောင်း နီဘာရန်း သဘောပေါက်သွားသည်။ ဟာရာရှန္ဒရီမှာ ထိုကိစ္စတွင် သူ့ယောက်ျား ပျော့ညံ့သည့်အဖြစ်ကို မျက်ဝါးထင်ထင် မြင်သွားကာ စက်ဆုပ်ရွံရှာခြင်း ဖြစ်မိသည်။ ဟာရာရှန္ဒရီသည် ရှေလဘာလာ၏လက်မှ သော့ကို ၀င်လုသည်။ ရှေလဘာလာက သော့တွဲကို အုတ်တံတိုင်းအပြင်ဘက် ကန်ကလေးထဲသို့ လွှင့်ပစ်လိုက်သည်။
“ဒီလိုဆို သော့ခလောက်ကို ဖျက်”ဟု ဟာရာရှန္ဒရီက ခြေမကိုင်မိ လက်မကိုင်မိ ဖြစ်နေသော သူ့ယောက်ျားကို ပြောသည်။
“ဖျက်ရဲဖျက်ကြည့်လေ။ ဒီကောင်မက ဆွဲကြိုးချသေပစ်လိုက်မယ်”ဟု ရှေလဘာလာက တည်ငြိမ်စွာ ပြောသည်။
“နေကွာ၊ ဒီလိုဆိုရင်လဲ အမေ့ဆီသွားပြီး လှည့်ရမှာပဲ” ဟုဆိုကာ နီဘာရန်းသည် အခန်းထဲမှ ပြေးထွက်သွားသည်။ နှစ်နာရီအတွင်း၌ကာ နီဘာရန်းသည် ဘိုးဘွားများနေထိုင်ခဲ့သော သူတို့အိမ်ကို နှစ်ထောင့်ငါးရာနှင့် ရောင်းပြီးခဲ့လေပြီ။
ဤသို့ဖြင့် လက်ထိပ်နှင့် သီသီကလေး လွဲခဲ့သည်။ သို့ရာတွင် အလုပ်မှ ပြုတ်လာခဲ့သည်။ သူသည်ပြောင်းရွှေ့နိုင်သော ပစ္စည်း၊ မပြောင်းရွှေ့နိုင်သော ပစ္စည်းဟူသမျှတို့အနက် မယားနှစ်ယောက်သာ ကျန်ရစ်ခဲ့သည်။ ထိုမယားနှစ်ယောက်အနက် ဂြိုဟ်မွှေသည့် မယားငယ်ကလေးမှာ ကိုယ်ဝန်ရှိလာသဖြင့် မရွှေ့ပြောင်းနိုင်သော အသွင်အပြင်ကို ပို၍ဆောင်လာသည်။ သူတို့အိမ်ထောင်သည် လမ်းကြားကလေးတစ်ခုထဲရှိ အိမ်အိုကလေးတစ်လုံးသို့ပြောင်းလဲလာခဲ့ကြသည်။
ရှေလဘာလာ၏ ဆင်းရဲဒုက္ခတို့မှ ဤတွင်မရပ်ဝေး။ သူ့ယောက်ျားသည် သူတို့ကို တင့်တောင့်တင့်တယ် မထားနိုင်ဆိုသည့် အချက်ကို လက်မခံ။ ဤသို့တင့်တောင့်တင့်တယ် မထားနိုင်လျှင် အဘယ့်ကြောင့် မယားနစ်ယောက် ယူခဲ့သေးသနည်း။
သူတို့အိမ်ကလေးမှာ အပေါ်ထပ်တွင် ရှိပြီး အခန်းနှစ်ခန်းသာ ရှိသည်။ တစ်ခန်းမှာ သူနှင့် နီဘာရန်းတို့ အိပ်ော အခန်းဖြစ်သည်။ “နေ့ရောညရော အိပ်ခန်းထဲ အောင်းနေရတော့မှာလားရှင့်”ဟု ရှေလဘာလာက ညည်းသည်။ ထိုအခါတွင် နီဘာရန်းကလည်း “ငါအိမ်ရှာနေပါတယ်ကွာ။ မကြာခင်ရတော့မှာပါ”ဟု ချွေးသိပ်တတ်သည်။
“ဟိုဘက်အိမ် အားနေတာပဲ အဲဒီအိမ်ကို ပြောင်းပါလား”
ရှေလဘာလာသည် နေရာဟောင်းတွင် မနေချင်။ အိမ်နီးချင်းဟောင်းများနှင့် မျက်နှာချင်း မဆိုင်ချင်။ အိမ်နီးချင်းများသည် နီဘာရန်း၏ အကြောင်းကို ကြားသိရသည့်အခါတွင် စိတ်မကောင်းဖြစ်ကာ လာရောက်မေးမြန်းကြသည်။ ထိုအခါမျိုးတွင် ရှေလဘာလာသည် အခန်းတံခါးကိုပိတ်ပြီး အခန်းအောင်းနေသည်။ ခေါ်လျှင်လည်း ထွက်မလာ။ ဧည့်သည်တွေ ပြန်သွားသည်နှင့် ရှေလဘာလာသည် အော်လားဟစ်လား လုပ်သည်။ ငိုလားယိုလား လုပ်သည်။ စိတ်ကောက်ပြီး ထမင်းမစားဘဲ နေသည်။ သူစိတ်ဆိုးနေကြောင်းကို အရှေ့ခုနစ်အိမ် အနောက်ရှစ်အိမ် သိအောင် လုပ်သည်။ ဤသည်မှာ တစ်ခါမဟုတ်၊ အခါခါဖြစ်သည်။
နောက်ဆုံးတွင် ရှေလဘာလာသည် အကြီးအကျယ်နာမကျန်းဖြစ်ကာ ကိုယ်ဝန်ပျက်ကျတော့မလို ဖြစ်နေသည်။ နီဘာရန်းက မယားကြီး၏ လက်ကို ဆုပ်ကိုင်ကာ “မင်း မကယ်နိုင်တော့ဘူးလားကွာ”ဟု မေးသည်။
ဟာရာရှန္ဒရီသည် နေ့ရောညပါ ပြုစုစောင့်ရှောက်၏။ တစ်ခုခုကို စိတ်တိုင်းမကျလျှင် ရှေလဘာလာသည် သူ့ကို ဆဲရေးတိုင်းထွာခြင်း ပြုသည့်တိုင် ခွန်းတုံ့ပြန်ခြင်း မပြု။ ရှေလဘာလာသည် ဘာလီရည်ကို မသောက်။ အဖျားတက်နေစဉ်တွင် ထမင်းနှင့်သရက်သီးသနပ်ကို စားမည်ဟု တဖွဖွတောင်းနေသည်။ တောင်းသည်ကို မရလျှင် အော်ကြီး ဟစ်ကျယ်လုပ်ပြီး သောင်းကျန်းတော့သည်။ သို့ရာတွင် ဟာရာရှန္ဒရီသည် သူ့ကို ကလေးငယ်တစ်ယောက်လို ချော့မော့ဖျောင်းဖျသည်။ ကလေးမရယ်။ ညီမရယ်စသည်ဖြင့် ချိုသာစွာ ခေါ်သည်။
ရှေလဘာလာသည် သက်ဆိုးမရှည်ရှာပါ။ သူ့ကို ချစ်ခင်ယုယသည့် ပတ်ဝန်းကျင်တွင် ကျင်လည်ပြီးနောက် တိုတောင်း၍ အချည်းအနှီးဖြစ်သော ဆူပူသောင်းကျန်းသည့်ဘ၀ကို စွန့်လွှတ်သွားခဲ့ပါသည်။
ပထမတွင် နီဘာရန်းသည် ဆောက်တည်မရဖြစ်သည်။ သို့ရာတွင် သံခြေကျင်းကြီးတစ်ခု ကျိုးပဲ့သွားပြီဆိုသည်ကို မကြာမီတွင် သဘောပေါက်လာသည်။ ပူဆွေးသောကဖြစ်သည့်တိုင် လွတ်မြောက်မှု ရသွားသည်ဟု ခံစားရသည်။ နီဘာရန်းသည် ရွှန်လန်းတက်ကြွနေလေသည်။ တစ်ခါတစ်ရံတွင်လည်း သူ့ ဘ၀တွင် နွယ်တစ်ခုလို ရစ်ပတ်နေသော ကြိုးတစ်ချောင်း ပြတ်သွားလေပြီ။ သူချစ်ရသော ရှေလဘာလာ တစ်ယောက် မရှိတော့ပြီဟု တွေးမိပြန်ကာ သက်ပြင်းကြီးတစ်ချက်ကို ချမိသည်။ သို့ရာတွင် သေသေချာချာ စဉ်းစားကြည့်သည့်အခါတွင် အမှန်ကို သူမြင်ပါသည်။ ရှေလဘာလာသည် သူ့အဖို့ ကြိုးစင်မှ ကြိုးကွင်းတစ်ကွင်းနှင့် အတူတူပင် ဖြစ်ပါသည်။
သူ့တစ်က်လုံး ပေါင်းခဲ့သည့် ဟာရာရှန္ဒရီကကော။ တကယ်စဉ်းစားကြည့်သည့်အခါတွင် ဟာရာရှန္ဒရီတစ်ယောက်သာလျှင် သူ့အတိတ်ဝတ်ကျောင်းတွင် ဂုဏ်ကျက်သရေရှိသည့် နေရာကို ရထိုက်သူ၊ သူသာလျှင် သူ့ဘ၀တွင် ၀မ်းသာစရာ၊ ၀မ်းနည်းစရာတို့ကို မျှဝေခံစားသူဖြစ်ကြောင်းကို ပို၍သဘောပေါက်လာသည်။ သို့တိုင်အောင် သူတို့နှစ်ဦးကြားတွင် ကွာဟချက်ရှိနေသေးသည်ဟု ထင်နေသည်။ တောက်ပြောင်၍ အကြင်နာကင်းမဲ့သည့် ဓားသွားကလေးတစ်ချောင်းသည် သူ့နှလုံးသားကို ထက်ပိုင်းဖြတ်သွားခဲ့ပြီး အလယ်ခေါင်တွင် ဒဏ်ရာဟတ်တက် ထားပစ်ခဲ့သည့်နှယ် ဖြစ်သည်။
သီတင်းပတ်များစွာအကြာ မြို့ကြီးတစ်မြို့လုံး အိပ်ပျော်နေသည့် ညတစ်ည၌ နီဘာရန်းသည် တစ်ယောက်တည်း အိပ်နေသော သူ့ဇနးသည် ဟာရာရှန္ဒရီ၏ အိပ်ခန်းထဲသို့ တိတ်တဆိတ် ၀င်လာခဲ့သည်။ သူသည် အလျင်တုန်းကလို သူ့ဇနီး၏ ညာဘက်တွင် အသာဝင်အိပ်လိုက်၏။ သို့ရာတွင် တစ်ခါက သူ့နယ်ပယ်ဖြစ်ခဲ့သော ထိုနေရာ၌ သူသည် လူစိမ်းတစ်ယောက်လို ဖြစ်န်ေသည်။
သူတို့နှစ်ယောက်စလုံး စကားတစ်ခွန်းမှ မပြောကြ။ သူတို့နှစ်ယောက်သည် အလျင်တုန်းကလိုပင် ဘေးချင်းယှဉ်၍ လှဲနေကြသည်။ သို့ရာတွင် ကွယ်လွန်သွားသည့် မိန်းကလေးသည် သူတို့ကြားထဲသို့ ရုတ်တရက် ရောက်လာခဲ့သည်။
သူတို့နှစ်ယောက်စလုံးသည် မိန်းကလေး၏ အရိပ်ကို မကျော်နိုင်ဘဲ ဖြစ်နေကြသည်။
(Rabindranath Tagore ၏ The Girl Between ကို ပြန်ဆိုသည်။)
မြသန်းတင့်
ရင်ခုန်ပွင့်၊ ၁၉၉၃ ခုနှစ်၊ မတ်လ။
