ကြွက်တွေနဲ့ ကျွန်တော်

နယ်အချို့မှာ ကြွက်တွေ အစုလိုက် အပြုံလိုက် ရွှေ့ပြောင်းနေတာ နှိမ်နင်းလို့ မနိုင်လောက်အောင် ဖြစ်နေတယ် ဆိုတဲ့ သတင်း တချို့ကို ဖတ်လိုက်ရတော့ ကြွက်နှင့် ပတ်သက်တဲ့ အတိတ် ဇာတ်လမ်း တချို့ကို သတိရမိ ပါတယ်။

ကျွန်တော်ဟာ ငယ်ငယ်က အတော်ကို အစား မရှောင်ဘဲ စားခဲ့ပါ တယ်။ ကြွက်သား၊ လိပ်သား၊ မြွေသား စသည်ဖြင့် သာမန်အားဖြင့် စားလေ့စားထ မရှိတဲ့ အစာမျိုးတွေကို ကြုံရင် ကြုံသလို စားတတ်ပါတယ်။

ကြောင်သားကိုတောင် ဆရာ သော်တာဆွေရဲ့ စာတွေထဲမှာ ကြောင်သား ချက်စားပုံကို သွားရည်ကျအောင် ရေးထားတာ ဖတ်ပြီး စားခဲ့မိဖူးပါတယ်။ နောက်မှ အိမ်မွေး တိရစ္ဆာန်ကလေးတွေကို ချစ်ခင်ကြင်နာရမယ်၊ သနား ကရုဏာ ထားရမယ်ဆိုတဲ့ လူ့ယဉ်ကျေး တွေရဲ့ ဓလေ့ စရိုက်တွေကို ဖတ်ရှု လက်ခံပြီး ကြောင်သားစားဖို့ မပြောနှင့် ကြောင်ကလေး တွေကို ရိုက်နှက် နှိပ်စက်ခြင်း ကိုတောင် စက်ဆုပ် ရွံရှာလာခဲ့ပါတယ်။

ကြွက်သားကိုတော့ ကျောင်းသား ဘ၀တုန်းက ကျွန်တော့်မွေး ဇာတိ မြစ်ကျိုးမြို့ကလေးနှင့် ဝေါမြို့ ၁၄ မိုင်ခရီးကို ပြေးဆွဲတဲ့ မော်တော်ဘုတ် ပေါ်မှာ ခဏခဏ စားဖူးပါတယ်။ ကျောင်းပိတ်ရက်မှာ မော်တော်နဲ့ အိမ်ပြန်တိုင်း လမ်းရွာတွေက မော်တော်ဆိပ် တွေမှာ ရောင်းတဲ့ လယ်ကြွက်ကင် တွေကို ၀ယ်စားပါတယ်။ ၀ါးညှပ်နဲ့ ကြပ်တင်ကင်ပြီး ရောင်းတဲ့ လယ်ကြွက်အကင် တစ်ကောင်ကို ၂၅ ပြားပေးရတာ မှတ်မိတယ်။ နီရဲပြီး ကြွပ်ရွနေတဲ့ လယ်ကြွက်ကင် နှစ်ကောင် လောက်တော့ တစ်ထိုင်တည်း အသာလေး စားလို့ ကုန်ပါတယ်။

အဲသလို လယ်ကြွက်သားကို ခံတွင်းတွေ့ခဲ့တဲ့ ကျွန်တော်ဟာ ၁၉၆၄ ခုနှစ် ဇူလိုင်က စပြီး လုံးဝ ရှောင်ခဲ့တာ ယနေ့ အထိပါပဲ။ လယ်ကြွက် မပြောနှင့် မြို့က အိမ်ကြွက်တွေ ကိုလည်း ကျွန်တော် လုံးဝရန်မပြုတော့ပါဘူး။ သူ့ဘာသာသူ တစ်စုံတစ်ရာကြောင့် သေနေတဲ့ ကြွက်ကို မြင်ရင်တောင် လွန်ခဲ့တဲ့ နှစ်၄၀ကျော် ၅၀နီးပါးက ကျွန်တော့် တွေ့ခဲ့တဲ့ မြင်ကွင်း တစ်ခုကို မျက်စိထJ ပြန်ပြီး မြင်ယောင်နေမိတယ်။

အဲဒီတုန်းက ကျွန်တော်ဟာ တက္ကသိုလ် ကျောင်းပိတ်ရက်မှာ ဒိုက်ဦးမြို့ နယ်၊ ဖော်တောင်သီ အပိုင်က ပကိုင်ဆိုတဲ့ ရွာကလေး တစ်ရွာကို အလည် သွားနေပါတယ်။ ပကိုင်ရွာဟာ မိုးတွင်းဆိုရင် တစ်ရွာလုံး ရေမြှုပ်ပါတယ်။ မြေပြင် လုံးဝ မတွေ့ရတော့ပါဘူး။အင်းလေး ကန်မြင်ကွင်းလို ခပ်ဆင်ဆင် တူပါတယ်။ အိမ်တိုင်း လှေနှစ်စင်း သုံးစင်းရှိပါတယ်။ အိမ်ကပြင်က ဆင်းလိုက်တာနဲ့ လှေပေါ် ရောက်သွားတာပါပဲ။

ပကိုင်ရွာကို ကျွန်တော်ရောက်တဲ့အချိန်ဟာ မိုးတွင်းကာလ ဖြစ်ပါတယ်။ တစ်ပတ်လောက် နေပြီးတော့ ရွာခံ မိတ်ဆွေ တချို့က သူတို့ ကြွက်ထိုးသွားတာ လိုက်ခဲ့ဖို့ ကျွန်တော့်ကို ခေါ်ပါတယ်။ ဒီလိုနဲ့ လိုက်သွားပါတယ်။ လှေနှစ်စင်း ရှေ့နောက် လှော်သွားကြပါတယ်။ ကျွန်တော်က ဒုတိယလှေ ရဲ့ အလယ်မှာထိုင်ပါတယ်။ လှေတစ်စင်းမှာ လူသုံးယောက် ပါပါတယ်။ လှေဦးက လူကကြွက် ကိုဖိုးဖို့ မှိန်းကြီး ကိုင်ထားတယ်။ ပဲ့က လူက လှေပဲ့ကိုင်တာပေါ့။ အလယ်လူက တက် တစ်ချောင်းနဲ့ လှော်ရပါတယ်။ကျွန်တော်က အလယ်က ထိုင်တော့ တက်တစ်ချောင်း ကိုင်ပြီး လှော်ခတ်ရတာပေါ့။

ရွာအပြင်ကို ရောက်တော့ ကိုင်းတောကြီး တွေကြားထဲ ရောက်သွားပါတယ်။ အချိန်က ညနေ စောင်းကလေးပါ။ မိုးက တဖြည်းဖြည်း သည်းလာတယ်။ ဓားလွယ်ခုတ် အနေအထားနဲ့ စိပ်နေအောင် ရွာနေပါတယ်။ ကိုင်းတောကြီးတွေက ဘယ်လောက်မြင့်သလဲ ဆိုတော့ လူတစ်ရပ် မြုပ်အောင်ရှိတဲ့ ရေအနက်အောက်မှာ မြုပ်မနေဘဲ ရေပေါ်မှာ တစ်တောင် ကျော်ကျော် လောက်ပေါ် နေပါတယ်။

ရှေ့လှေက ကွပ်ကဲရေး တာဝန်ယူထားလေ တော့ သူတို့က “ဖြည်းဖြည်းဟေ့”ဆိုရင် ကျွန်တော်တို့က အလှော်ရပ်ပြီး အရှိန်နဲ့ပဲ သွားနေရတယ်။ သူတို့လှေ အမြန်လှော်တော့မှ နောက်က အမြန်လှော်ပြီး လိုက်ရတယ်။ လှေနှစ်စင်းဟာ ကိုင်းတောကြီးကြားမှာ ဦးထိုးပြီး ရွေ့နေပါတယ်။ တစ်ချက်တစ်ချက် ရှေ့လှေက အသံတွေ ကြားရတယ်။ ဇွပ်ဇွပ်ဆိုတဲ့ အသံတွေ။ ဒုတ်ဘုတ်ဆိုတဲ့ အသံတွေ၊ မိပြီကွလို့ ခပ်အုပ်အုပ် အော်တဲ့ အသံတွေ။

ကျွန်တော့်လှေမှာ လှေဦးက ထိုင်တဲ့လူက လက်ထဲက မှိန်းကြီးကို အသင့်ကိုင်ပြီး ၀ဲယာ ကိုင်းဖုတ်တွေပေါ်ကို ကြည့်ပြီး လိုက်လာတယ်။ ခဏကြာတော့ သူမှိန်းမြှောက်လိုက်တာ လက်ခနဲ မြင်ရပြီး ဇွပ်ဆိုတဲ့ အသံ ကြားလိုက်တယ်။ မှိန်းဦးက ကျွန်တော့်ရှေ့လှေဝမ်းထဲကို ရောက်လာပြီး လှေကန်နဲ့ ခြစ်ချလိုက်တဲ့ အခါ မှိန်းနဲ့ တိုးပြီးပါလာတဲ့ လယ်ကြွက်ကြီးဟာ ဘုတ်ခနဲ လှေဝမ်းထဲ ပြုတ်ကျသွားပါတယ်။ ရှေ့လှေက ကြားရတဲ့ အသံတွေ အကြောင်း ခုမှ သဘော ပေါက်ရပါတော့တယ်။ လှေဝမ်းထဲမှာ သွေး အလိမ်းလိမ်းနဲ့ လယ်ကြွက်ကြီးဟာ လိမ့် နေပါတယ်။ ဒီလိုနဲ့ပဲ ခဏကြာရင် နောက်တစ် ကောင်၊ ပြီးတော့ နောက်တစ်ကောင်။ ကျွန်တော့် ရှေ့မှာချည်းပဲ ငါးကောင်လောက် ရှိနေပါတယ်။

တစ်ကြိမ်မှာ လှေကို အရှိန်နဲ့ပဲ လွှတ်ပေး ထားတုန်း ကျွန်တော်တက်ကို ချကာ မှိန်းဆရာ လုပ်ပုံကို ကြည့်မိပါတယ်။ လှေဦးတိုး ၀င်သွားတဲ့ ဘေးတစ်ဘက် တစ်ချက် ကိုင်းဖုတ်တွေပေါ်မှာ ကံဆိုးရှာတဲ့ ကြွက်က ငုတ်တုတ်ကလေးထိုင် နေတာကိုး။ သည်းသည်း မည်းမည်းထောင့် ဖြတ်ခုတ်ပြီး ရွာနေတဲ့ မိုးစက်တွေအောက်မှာ ကိုင်းဖုတ်ပေါ် ငုတ်တုတ် ထိုင်နေတဲ့ လယ်ကြွက်ကို ကျွန်တော် အနီးကပ် မြင်ရတယ်။ မိုးပက်တဲ့ ဘက်ကို ကျောပေးပြီး ကုပ်ကုပ် ကလေး ထိုင်နေတယ်။ ကျွန်တော်တို့ ရှေ့က လှေကျော်သွားပြီ။ သူ့ကို တွေ့သွားပုံ မရဘူး။ ရှေ့လှေ အဖြတ်မှာ သူက ကိုင်းဖုတ်ကြားထဲ ပုဝင်ပြီး ပုန်းနေသလား မသိ။ ရှေ့လှေ ကျော်သွားတော့ ရေထဲ ၀ပ်နေရာက ကိုင်းဖုတ်ပေါ် ပြန်တက် ပုံရပါတယ်။

မိုးက ပက်ဖြန်းတော့ ကျောပေး ခံထားတုန်း ကျွန်တော်တို့ လှေတိုးသံ ကြားတော့ လှည့်အကြည့် အဲဒီကြွက်ရဲ့ မျက်နှာ (အထူးပြောချင်တာက မျက်စိနှစ်လုံး)ကို ကျွန်တော်တွေ့လိုက်တယ်။ သူ တည့်တည့် လှမ်းမြင် လိုက်ရမှာက သူ့ဆီ တည့်တည့် ၀င်လာတဲ့ မှိန်းသွား။ ဒါပေမယ့် ကြွက်ဟာ ထွက်မပြေးဘူး။ (ကျွန်တော်ထင်တယ်။ ကြိုးစားပြီးထွက်ပြေးရင် မီကောင်း မီနိုင်တယ်။) မှိန်းနဲ့ လှမ်းထိုးချိန်မှာ အသာကလေး ကျောပြန် ပေးပြီး ငြိမ်နေလိုက်တယ်။ဇွပ်ခနဲ အသံကြား လိုက်ရပြီး အဲဒီကြွက်ဟာ မှိန်းသွားမှာ တန်းလန်း ပါလာကာ ကျွန်တော့်ရှေ့က လှေအကန့် အောက်ကို ရောက်လာပါတယ်။ သွေးအလိမ်းလိမ်း ကြားထဲက သူ့မျက်လုံးတွေကို ကျွန်တော် လှမ်းကြည့်မိတယ်။မျှော်လင့်ချက် လုံးဝမထားတော့တဲ့ မျက်လုံးတွေ။ စိတ်လျှော့လိုက်တဲ့ မျက်လုံးတွေလို့ ကျွန်တော် သိလိုက်တယ်။

လှေထိုးသံကြားလို့ ကိုင်းဖုတ်ပေါ် ကျောပေး ထိုင်နေရာက လှည့်ကြည့်လိုက်တဲ့ မျက်လုံးတွေ။ ပထမ ထိတ်လန့်သွားတယ်။ ပြီးတော့ မှိန်းသွား သူ့ဆီလာနေတာကို မြင်လိုက်တဲ့အခါ အန္တရာယ် ကို သိလိုက်လို့ တုန်လှုပ်သွားတယ်။ ဒါပေမယ့် ပြေးစရာ မြေလည်း မရှိတော့ဘူး။ ပြေးရင်လည်း လွတ်ချင်မှ လွတ်မယ်။ ဒီတစ်ခါ လွတ်ဦးတော့ နောက်တစ်ခါ မိဦးမှာပဲ။ မထူးတော့ပါဘူးလေ။ သေလိုက်ပါတော့မယ် ဆိုတဲ့ မျှော်လင့်ချက် ကုန်ဆုံးသော အားလုံးကို အရှုံးပေးသွားသော မျက်လုံးတွေကို ကျွန်တော့် အာရုံတွေက သိလိုက်တယ်။လှေဝမ်းထဲမှာ သွေးအလိမ်းလိမ်းနဲ့ သေခါနီး ကြည့်သွားတဲ့ မျက်လုံးတွေက “ခင်ဗျားတို့ ရက်စက်လိုက်ကြတာဗျာ။ ရေတွေ ကြီးလို့ ကိုင်းပင်ပေါ် တက်နေရတဲ့ သတ္တ၀ါကိုတောင် သတ်ရက်ကြတယ်ဗျာ” လို့ ပြောသွား သလိုပဲ။

အဲဒီနေ့ ကြွက်သားဟင်း၊ ကြွက်ကင်၊ ကြွက်ကြော် အမျိုးစုံနဲ့ ပျော်ပွဲ စားကြတဲ့ ညစာ စားပွဲမှာ ကျွန်တော် မပါတော့ပါဘူး။ တော်အောင် လျော်အောင် ပြောဆိုပြီး ရှောင်နေခဲ့ပါတယ်။ နောင်လည်း တစ်သက်လုံး ရှောင်လာခဲ့တာ ယခု အထိပါပဲ။ သူ့ဇီဝိန်ကို ချွေတော့မယ့် မှိန်းသွားကို တစ်ချက်ကြည့်ပြီး ကျောလှည့် ခံသွားတဲ့ ကြွက်တစ်ကောင်ရဲ့မြင်ကွင်းဟာ ကျွန်တော့်ကို ရာသက်ပန် ကြွက်သား ရှောင်သူ ဖြစ်စေခဲ့ပါတယ်။

မောင်ဝံသ
(ပေဖူးလွှာ မဂ္ဂဇင်း၊ စက်တင်ဘာလ ၂၀၁၀)

Posted in: